„Sagan segir okkur að þetta sé ekki síðasti heimsfaraldurinn og að faraldrar séu hluti af lífinu,“ sagði Tedros á fjarfundi sem var haldinn í tilefni þess að gærdagurinn, 27. desember, var fyrsti alþjóðlegi dagurinn tileinkaður undirbúningi undir faraldra. Aðalþing SÞ samþykkti nýlega að dagurinn yrði framvegis tileinkaður „alþjóðlegum undirbúningi undir faraldra“. Markmiðið er að reyna að tryggja að heimurinn læri af yfirstandandi heimsfaraldri kórónuveirunnar og búi sig undir faraldra framtíðarinnar.
Tedros sagði að nauðsynlegt væri að auka fjárfestingar hins opinbera í heilbrigðiskerfum til að tryggja „að börnin okkar og börnin þeirra erfi heim með betra mótstöðuafl og meiri sjálfbærni“.
Hann sagði einnig að þrátt fyrir að kórónuveiran hafi „snúið heiminum á hvolf“ síðasta árið hafi faraldurinn ekki komið WHO á óvart. Sérstaklega ekki þar sem stofnunin hafi árum saman varað við hættunni á að heimsfaraldur myndi skella á og að heimsbyggðin væri ekki undir slíkt búin. „Við verðum öll að læra af þeim lexíum sem heimsfaraldurinn hefur kennt okkur,“ sagði hann. Þetta þýðir að hans sögn að stjórnvöld um allan heim verða að fjárfesta meira í undirbúningi fyrir nýja faraldra og ekki bara í hinu hefðbundna heilbrigðiskerfi.
