Playboy-fyrirsætan Arna Bára Karlsdóttir segist vera búin að fá upp í kok vegna dónalegra mynda sem karlmenn senda henni. Í gær segist hún hafa fengið fimm myndir af getnaðarlimum sendar.

„Fimm typpamyndir í dag. Og dagurinn er nýbyrjaður, í alvöru strákar???,“ skrifaði hún á Facebook-síðu sína á ensku. „Mér finnst þetta ekki sexí. Mér finnst þetta ógeðslegt og algjör vanvirðing,“ segir Arna og bætir við, líklega meira í gamni en alvöru, að hún íhugi að búa til lista yfir þá sem senda slíkar myndir.

Í athugasemdum undir færslu hennar á Facebook stingur ein upp á að hún geri það sama og fyrirsætan Emily Sears gerir þegar hún fær slíkar myndir sendar. Pressan greindi frá því í gær að hún sendi þær til kærustu eða eiginkonu viðkomandi sé hann á annað borð í föstu sambandi. Emily segist fá tvær slíkar myndir sendar á dag að jafnaði.