Rúmlega fjögur þúsund manns hafa skrifað undir undirskriftarsöfnun þar sem skorað er á ríkisstjórnina að fullfjármagna niðurgreiðslu á sálfræðiþjónustu. Uppreisn, ungliðahreyfing Viðreisnar, stendur að undirskriftarsöfnuninni.

Hægt er að skrifa undir með því að smella hér og skora þar með á ríkisstjórnina að tryggja að sálfræðiþjónusta verði aðgengileg öllum.

„Ríkisstjórnin hyggst  aðeins fjármagna um 5% af áætlaðri þörf að aðgengi. Á viðsjárverðum tímum verður þjónustunni haldið frá stórum hóp þjóðarinnar vegna kostnaðar. Það er óásættanlegt,“ segir í tilkynningu frá Uppreisn.

Lög um niðurgreiðslu á sálfræðiþjónustu voru síðastliðið vor samþykkt einróma á Alþingi. Samkvæmt lögunum á að niðurgreiða sálfræðiþjónustu með sama hætti og aðra heilbrigðisþjónustu. Í frumvarpi til fjárlaga 2021 er hins vegar ekki gert ráð fyrir nema 5% af nauðsynlegu fjármagni í niðurgreiðslu á sálfræðiþjónustu, sem þýðir að þjónustan verður áfram kostnaðarsöm og óaðgengileg.

Geðheilbrigði fer versnandi

Því hefur Uppreisn, ungliðahreyfing Viðreisnar, sett af stað undirskriftasöfnun til að þrýsta á ríkisstjórnina að leggja til það fjármagn sem nauðsynlegt er til að hægt sé að standa við niðurgreiðsluna.

„Það er gríðarlega mikilvægt að allir hafi greiðan aðgang að sálfræðiþjónustu og annarri klínískri samtalsmeðferð, óháð tekjum eða annarri þjóðfélagsstöðu. Ungt fólk hefur hvað síst efni á að leggja út fyrir sálfræðimeðferð og núverandi ástand bitnar jafnt á þeim og öðrum. Núna í miðjum heimsfaraldri, þegar fólki líður illa og geðheilbrigði fer versnandi, er sérstaklega brýnt að tryggja fulla niðurgreiðslu á sálfræðiþjónustu. Það er pólitísk ákvörðun ríkisstjórnarinnar að þessi þjónusta skuli áfram vera dýr og óaðgengileg þrátt fyrir að þörfin hafi aldrei verið meiri. Ég skora því á ríkisstjórnina að standa við niðurgreiðsluna,” segir Starri Reynisson, forseti Uppreisnar, í tilkynningu.