Vegna aurflóða á Seyðisfirði hafa íbúða- og atvinnuhúsnæði verið rýmd tímabundið í fjórum götum neðan við svokallaða Botna. Fjöldahjálparstöð Rauða krossins var opnuð í félagsheimilinu Herðubreið á Seyðisfirði þar sem Rauði krossinn veitti aðhlynningu þeim er þangað leituðu. Aðrir leituðu skjóls hjá ættingjum.
Þetta kemur fram í tilkynningu frá Lögreglustjóranum á Austurlandi. Þar segir að engin slys hafi orðið á fólk í aurskriðunum. Vitað er að skriða náði að tveimur húsum að minnsta kosti og flæddi inn í nokkur. Óvíst er með skemmdir en það ætti að skýrast betur með morgninum.
Enn er óvissustig vegna skriðuhættu á svæðinu. Veðurspá gerir ráð fyrir áframhaldandi rigningu fram að helgi. Óvíst er hvenær íbúar geta snúið til síns heima en staðan verður metin á morgun.
Myndin hér að neðan sýnir skriðu á svæðinu.
Meðan óvissustig ríkir eru íbúar hvattir til að fylgjast vel með tilkynningum lögreglu. Næst verður send tilkynning um klukkan tíu í fyrramálið.
