Það bréf var sent til The San Francisco Chronicle í nóvember 1969. Sky News skýrir frá þessu. Fram kemur að það hafi verið ástralski hugbúnaðarverkfræðingurinn Sam Blake, bandaríski dulmálssérfræðingurinn David Oranchak og belgíski hugbúnaðarverkfræðingurinn Jarl Van sem hafi leyst dulmálið. Það var skrifað með 340 táknum sem þeir réðu. Innihald bréfsins er svohljóðandi í lauslegri þýðingu:
„ÉG VONA AÐ ÞIÐ SKEMMTIÐ YKKUR VEL VIÐ AÐ REYNA AÐ NÁ MÉR ÞETTA VAR EKKI ÉG Í SJÓNVARPSÞÆTTINUM SEM DREGUR UPP MYND AF MÉR ÉG ER EKKI HRÆDDUR VIÐ GASKLEFANN ÞVÍ HANN MUN SENDA MIG Í PARADÍS ÞEIM MUN FYRR ÞVÍ ÉG ER MEÐ NÓG AF ÞRÆLUM TIL AÐ VINNA FYRIR MIG ÞAR SEM AÐRIR HAFA EKKERT ÞEGAR ÞEIR KOMA Í PARADÍS SVO ÞEIR ERU HRÆDDIR VIÐ DAUÐANN ÉG ER EKKI HRÆDDUR ÞVÍ ÉG VEIT AÐ NÝJA LÍFIÐ MITT ER LÍF SEM VERÐUR AUÐVELT Í PARADÍS DAUÐANS.“
Vonast hafði verið til að í skilaboðunum væri eitthvað sem gæti varpað ljósi á hver morðinginn var en ekkert kemur fram um það. Alríkislögreglan FBI sagði í yfirlýsingu að sérfræðingar hennar hefðu farið yfir lausnina og samþykkt hana.
Morðinginn hefur aldrei náðst og málið er enn til rannsóknar hjá lögreglunni.
Hinn sjálfútnefndi Stjörnumerkjamorðingi var tengdur við fimm morð, sem voru framin í norðurhluta Kaliforníu 1968 og 1969, og er talinn hafa framið fleiri. Hann stríddi lögreglunni með því að senda henni og fjölmiðlum dulmálsbréf frá 1969 til 1974 en þá hætti hann því skyndilega.
Þrátt fyrir mikla rannsóknarvinnu var enginn handtekinn vegna morðanna og hafa þau alla tíð verið sveipuðu mikilli dulúð og orðið uppspretta margra bóka og kvikmynda.
Fjórar árásir hafa verið tengdar við Stjörnumerkjamorðingjann en fimm létust í þeim. Grunur leikur á að hann hafi myrt fleiri en ekki hefur verið hægt að staðfesta það.
Fyrsta árásin var gerð að kvöldi 20. desember 1968. Þá voru David Faraday, 17 ára, og 16 ára unnusta hans, Betty Lou Jens, skotin til bana nærri bíl þeirra á afskekktum stað við Lake Herman Road í útjaðri Vallejo í Kaliforníu. Lögreglan stóð ráðþrota og hafði ekki hugmynd um ástæðuna fyrir morðunum né hver gæti hafa verið að verki.
Snemma að morgni 5. júlí 1969 sátu Darlene Ferrin, 22 ára, og unnusti hennar, Mike Mageau 19 ára, í kyrrstæðum bíl á afskekktum stað í Vallejo. Þá gekk maður, með vasaljós að þeim, og skaut mörgum skotum á þau. Ferrin lést en Mageau særðist alvarlega. Tæpri klukkustund síðar hringdi maður í lögregluna í Vallejo og gaf upp nákvæma staðsetningu vettvangsins og sagðist einnig hafa verið að verki þegar Faraday og Jensen voru myrt 1968. Þrátt fyrir að lögreglan hafi fundið fingraför hins grunaða á vettvangi og að Mageau hafi getað lýst honum og að margar ábendingar bárust fann lögreglan morðingjann ekki.
Að kvöldi 27. september 1969 lét hann til skara skríða á nýjan leik. Þá gaf hann sig að ungu pari, Cecelia Shepard og Bryan Hartnell, sem voru að slaka á við Lake Berryessa í Napa County. Hann var í hettupeysu og skyrtu með mynd af krossi sem hringur var utan um. Hann batt þau og stakk þau síðan, skrifaði skilaboð til lögreglunnar á hurð bíls þeirra og skildi þau eftir. Hann hringdi síðan í lögregluna í Napa og sagðist bera ábyrgð á árásinni. Shepard og Hartnell voru bæði á lífi þegar viðbragðsaðilar komu á vettvang en Shepard lést skömmu síðar.
Aðeins tveimur vikum síðar, 11. október, skaut Stjörnumerkjamorðinginn Paul Stine, 29 ára leigubílstjóra, til bana í Persidio Heights í San Francisco. Í fyrstu var talið að um ránsmorð hefði verið að ræða og var Stjörnumerkjamorðinginn ekki tengdur við það fyrr en San Fransicso Chronicle fékk bréf frá honum þar sem hann játaði ódæðið á sig.
Talið er hugsanlegt að hann hafi myrt fimm til viðbótar. Þar á meðal Robert Domingos og Linda Edwards sem voru skotin til bana í Santa Barbara 1963 og Cheri Jo Bates sem var stungin til bana í Riverside í Kaliforníu 1966. Þetta hefur þó ekki fengist staðfest með áreiðanlegum hætti.
Enginn hefur verið handtekinn vegna morðanna og það þrátt fyrir að lögreglan hafi látið gera teikningu af morðingjanum eftir frásögn vitna. Málið hefur að vonum pirrað lögregluna alla þessa áratugi en hún hefur ekki komist nálægt því að leysa það. Almenningur hefur einnig haft mikinn áhuga á málinu og margar kenningar hafa verið settar fram um hver morðinginn er. Ákveðin nöfn hafa verið nefnd en ekki hefur tekist að tengja viðkomandi við morðin með óyggjandi hætti og því eru málin enn óleyst og ólíklegt verður að teljast að hægt verði að leysa þau nema eitthvað sérstakt gerist. Ekki er heldur ósennilegt að morðinginn sé látinn og muni því aldrei játa ódæðin.
