Morgunblaðið skýrir frá þessu í dag. Haft er eftir Agnari Tómasi Möller, sérfræðingi í skuldabréfaviðskiptum, að það þurfi að hafa í huga að skuldabréfaflokkurinn sé ekki alveg samanburðarhæfur við önnur skuldabréf sem borgin hefur gefið út. Munur sé á tímalengd bréfanna. „Miðað við markaðinn eins og hann var fyrr í vikunni sýnist mér að þarna sé verið að bjóða 1,25% álag ofan á ríkisvexti,“ sagði Agnar.
Á síðustu árum hefur borgin yfirleitt fengið kjör sem eru 60-70 punktum yfir því sem ríkið fær að sögn Agnars en þeir vextir hafa farið hækkandi á árinu og er borgin til dæmis með annan skuldabréfaflokk sem er með rúmlega 100 punkta álagi að hans sögn. Hann sagði álagið ansi hátt.
Sértryggð skuldabréfaútgáfa bankanna, sem er notuð til að fjármagna húsnæðislán, eru með 60 punkta í álag ofan á ríkisvexti og álag fasteignafélaga er um 140 punktar að sögn Agnars. Borgin er því komin ansi nálægt því. Álag á skuldir borgarinnar hefur því tæplega tvöfaldast á árinu og vaxtakjörin versnað.
„Öll langtímafjármögnun er orðin ákaflega dýr, einkum í alþjóðlegum samanburði. Fjármögnun hins svokallaða Græna plans borgarinnar á næsta ári gæti orðið áskorun,“ er haft eftir Agnari sem sagði einnig að greiðslubyrði af langtímalánum hér á landi sé miklu hærri en í flestum öðrum vestrænum ríkjum. „Við munum borga miklu hærri vexti af Covid-hallanum en flest önnur ríki.“
