Arnar Þór Viðarsson er einn þeirra þjálfara sem KSÍ hefur rætt við sem næsta þjálfara hjá A-landsliði karla í knattspyrnu. Þetta staðfestir hann í samtali við Stöð 2.
Erik Hamrén lét af störfum sem landsliðsþjálfari á dögunum þegar ljóst var að liðið kæmist ekki á Evrópumótið næsta sumar.
Arnar, sem er þjálfari undir 21 árs landsliðs karla, segir að ekki sé búið að bjóða honum starfið. „Ég hef alltaf sagt að ef einhver býður mér að taka við íslenska A-landsliðinu þá segi ég já. Ég tel það mjög eðlilegt svar. Það er ekki búið að bjóða mér starfið.
Ég veit að þeir sem eru að vinna í þessum málum hafa talað við nokkra aðila. Það er ekkert launungarmál að ég er einn af þeim. Þetta mál er í vinnslu. Það er mjög eðlilegt að þegar svona stórar ákvarðanir eru teknar – er að það er talað við nokkra aðila. Það er ekki hægt að hlaupa að næsta manni og segja að þú tekur þetta,“ sagði Arnar við Stöð 2.
Arnar segir að KSÍ hafi einnig rætt við aðra þjálfara. „Ég er búinn að eiga gott samtal við stjórnendur KSÍ sem ráða þessu og útskýra mitt mál. Svo taka þau sama starfsviðtal við aðra aðila og þegar að því kemur að þeir taka ákvörðun að þá mun einhver hringja í mig og segja að ég hafi fengið starfið eða ekki. Þetta er ekkert flóknara.“
Ljóst er að U-21 árs landsliðið þarf nýjan þjálfara taki Arnar við A-landsliðinu. U-21 liðið mun spila í lokakeppni Evrópumótsins á sama tíma og A-landsliðið spilar í undankeppni Heimsmeistaramótsins í mars.
