Knattspyrnudeild Vals og Arnór Smárason hafa komist að samkomulagi um að Arnór leiki með félaginu næstu 2 árin. Arnór gengur til liðs við Val frá Lilleström.

„Þessi öflugi landsliðsmaður gerði sinn fyrsta atvinnumannasamning við Heerenveen 2007 og hefur leikið erlendis allan sinn feril hingað til, spilað til að mynda í Hollandi, Svíþjóð, Danmörku, Rússlandi og Noregi og nú Íslandi,“ segir á vef Vals.

Arnór sem er margreyndur landsliðsmaður á að baki 26 leiki með A landsliði Íslands og skorað í þeim 3 mörk.

„Það er frábært fyrir Íslenskan fótbolta að fá þennan öfluga leikmann heim og um leið sýnir það þann metnað og vilja til að gera deildina betri,“ segir á vef Vals en Arnór lék síðast með Lilleström.

Arnór hafði verið orðaður við uppeldisfélag sitt ÍA en hann er fyrsta stóra nafnið sem Íslandsmeistarar Vals sækja í vetur.