Þetta er haft eftir Margréti Valdimarsdóttur, lektor við félagsvísindadeild Háskólans á Akureyri, í Fréttablaðinu í dag. „Stór hluti Íslendinga trúir því að líkur á hryðjuverkum hér á landi aukist með auknum fjölda innflytjenda,“ sagði hún.
„Um fjörutíu prósent Íslendinga trúa því að hryðjuverkaógn aukist hér með auknum fjölda innflytjenda og flóttafólks frá löndum þar sem múslimar eru í meirihluta og það er áhyggjuefni. Þessi viðhorf og þessi ótti hefur síðan áhrif á það hversu jákvætt fólk er gagnvart því að taka á móti flóttafólki og rannsóknir sýna að því neikvæðara sem viðhorf er til flóttafólks og innflytjenda í móttökulandinu því ólíklegra er að þau aðlagist samfélaginu“ sagði hún einnig.
Hún sagði jafnframt að það sé eitthvað sem þarf að hafa áhyggjur af þegar innflytjendur eiga erfitt með að aðlagast samfélaginu. Hún sagði jafnframt að áhrif fjölgunar innflytjenda geti verið bæði jákvæð og neikvæð. „Þegar maður skoðar það í mismunandi löndum heimsins þá sér maður að það fer mikið eftir því hvernig móttökurnar eru og viðhorf samfélagsins. Það að innflytjendur samlagist samfélaginu skiptir miklu máli,“ sagði hún.
Hún sagði einnig að aðrir þættir en þeir að fólk sé innflytjendur eða flóttafólk hafi líklega meiri áhrif á afbrotahegðun, til dæmis tekjur og menntun. Það hafi sýnt sig í Svíþjóð þar sem opinberar tölur bendi til að innflytjendur séu líklegri til að brjóta af sér en aðrir. Þetta gerist þrátt fyrir að góð innflytjendastefna sé rekin en fólk sé samt sem áður ekki að ná að aðlagast sænsku samfélagi.
