Maður var í gær sakfelldur fyrir Héraðsdómi Reykjaness fyrir alvarleg kynferðisbrot gegn stúlkubarni sem er stjúpbarnabarn hans. Einnig var maðurinn sakfelldur fyrir vörslu barnakláms.
Maðurinn misnotaði traust og trúnað barnsins í afahlutverkinu og hafði önnur kynferðismök við barnið en samræði með því að láta hana fróa sér. Um er að ræða nokkur atvik frá 2018 til 2019.
Stúlkan skýrði frá brotinu í Ævintýralandi Kringlunnar þar sem hún hélt upp á afmæli sitt en hún hafði meiðst í skemmtigarðinum og sagði hún föður sínum frá ofbeldi stjúpafans er hann hlúði að henni. Í dómnum segir meðal annars:
„Með bréfi Barnaverndar Reykjavíkur dags. 24. júní 2019 var sett fram beiðni til lögreglunnar á höfuðborgarsvæðinu um rannsókn á meintu kynferðisofbeldi ákærða gegn brotaþola Y sem fædd er árið […] en ákærði var sambýlismaður ömmu brotaþola. Í bréfinu segir að stúlkan hafi greint foreldrum sínum frá því að ákærði, sem stúlkan kallaði afa, hafi sýnt henni typpið á sér í nokkur skipti og látið hana snerta það. Stúlkan hafi verið að halda upp á afmæli sitt í Ævintýralandi í Kringlunni […]og meitt sig. Þegar faðir hennar hafi verið að hlúa að henni hafi hún sagt honum að hún hafi snert typpið á Xafa sínum. Stúlkan hafi sagt að afi kallaði alltaf á hana þegar hann væri að skipta um föt og léti hana þá snerta typpið á sér og gera ,,upp og niður.“ Stúlkan sagði föður sínum að þetta hefði gerst oftar en einu sinni en hún héldi að amma sín vissi ekki af þessu. Stúlkan bað föður sinn að segja ekki X afa frá þessu því þá yrði hann leiður.“
Er maðurinn var handtekinn sagði hann við lögreglu að hann hefði verið að passa barnabörn sín og hugsanlega hefði hann farið yfir einhver mörk hjá þeim án þess að gera sér grein fyrir því. Lagt var hald á tölvu- og símabúnað mannsins og fundust klámfengnar myndir af börnum í tækjum hans.
Fyrir dómi neitaði maðurinn hins vegar að hafa gerst um sekur um þá háttsemi sem hann var ákærður fyrir.
Framburðir foreldra stúlkunnar og skólahjúkrunarfræðings sem hún ræddi brotin við, sem og lögreglumanns sem ræddi við hinn ákærða er hann var handtekinn, bentu til sektar mannsins. Þegar við bættist brot hans varðandi vörslu barnakláms og sannfærandi og stöðugur framburður stúlkunnar þótti dómnum komnar fram nægar sannanir til að sakfella manninn. „Með vísan til alls ofanritaðs verður að telja það hafið yfir skynsamlegan vafa, þrátt fyrir neitun ákærða, sem þykir ekki trúverðug, að ákærði hafi gerst sekur um þá háttsemi sem honum er gefin að sök í 1. ákærulið,“ segir í texta dómsins.
Maðurinn var því sakfelldur fyrir kynferðisbrot gegn stúlkunni og vörslu barnakláms Skal hann sæta fangelsi í tvö og hálft ár. Þá skal hann greiða brotaþola eina og hálfa milljón í miskabætur og sakarkostnað upp á um tvær og hálfa milljón króna.
