Bandarísk flugmálayfirvöld hafa gefið út flughæfnisvottorð fyrir Boeing 737-MAX-vélarnar sem hafa verið kyrrsettar um allan heim frá því í mars á síðasta ári. Ástæður kyrrsetningarinnar eru tvö mannskæð flugslys í Jövuhafi og Eþíópíu sem kostuðu 346 lífið.

Icelandair reiknar með að MAX-vélarnar verði teknar í notkun næsta vor. Þetta hefur Morgunblaðið eftir Boga Nils Bogasyni, forstjóra Icelandair Group.

Fram kemur að reiknað sé með að Evrópska flugmálaeftirlitið muni taka sér tvo mánuði til að fara yfir niðurstöður bandaríska flugmálaeftirlitsins. Því sé líklegt að flughæfi vélanna verði staðfest af Evrópska flugmálaeftirlitinu í janúar.

Haft er eftir Boga að Icelandair geri ekki ráð fyrir að taka vélarnar inn í áætlun sína fyrr en nokkru eftir það. Miðað við núverandi umsvif sé félagið með nægilega margar vélar til að annast þau.

Bogi sagði einnig að fram undan væri vinna við að byggja upp traust á vélunum. Hann sagði það ótvíræðan kost að reynsla verði komin á vélarnar í Ameríku og Evrópu þegar Icelandair hyggst taka þær í notkun. „Það mun staðfesta fyrir fólki það sem við höfum sagt að þessar vélar eru mjög traustar,“ er haft eftir honum.