Kvöldið áður en Karl Bretaprins og Díana Spencer, sem fékk síðan prinsessutitil, gengu í hjónaband sagði Karl henni einar verstu fréttir sem nokkur brúður getur fengið. Þetta kemur fram í nýrri heimildamynd: The Diana interview: The Revenge of a Princess. Það er Penny Thornton sem segir þetta í myndinni en hún er stjörnuspekingur sem Díana byrjaði að ráðfæra sig við 1986.

Samkvæmt því sem hún segir þá var Díana við það að aflýsa brúðkaupinu eftir að Karl sagði henni að hann elskaði hana ekki. Daily Star skýrir frá þessu.

Karl og Díana kynntust 1977 en það var ekki fyrr en nokkrum árum síðar sem ástir tókust þeirra á milli. Karl bað Díönu í febrúar 1981 og þau gengu í hjónaband þann 29. júlí þetta sama ár. En kvöldið áður taldi Karl rétt að létta á hjarta sínum við Díönu og segja henni sannleikann um að hann elskaði hana ekki.

„Það var hræðilegt að gera verðandi eiginkonu sinni þetta, daginn fyrir brúðkaupið,“ segir Thornton í myndinni.

En brúðkaupinu var ekki aflýst og þau játuðust hvort öðru eins og til stóð. Hjónabandið var stormasamt og þau virtust ekki eiga vel saman, hvort 13 ára aldursmunur átti þar hlut að máli er ekki vitað með vissu. 11 árum eftir að þau gengu í hjónaband var tilkynnt að þau ætluðu að skilja. Þau eignuðust synina William og Harry.