Undanfarið hafa nokkurs konar innheimtubréf frá þrotabúi Jóa Fel samstæðunnar, sem varð gjaldþrota fyrir skömmu, vakið mikla athygli. Fyrrverandi starfsfólk hjá samstæðunni er þar sagt skulda henni fjármuni sem spanna frá rúmlega 20 þúsund krónum og upp hátt í 300.000 krónur. Starfsfólkið kannast ekki við að skulda fyrirtækinu krónu enda hafi vöruúttektir þess ávallt verið dregnar frá launum. Hafa bréfin skotið mörgum skelk í bringu, en sumt starfsfólkið hætti störfum hjá samstæðunni löngu fyrir gjaldþrot hennar.
Skiptastjóri þrotabúsins er Grímur Sigurðsson lögmaður sem starfar á lögmannastofunni Landslög. DV fékk ábendingu þess efnis að eiginkona Gríms hefði starfað um skeð á skrifstofu Jóa Fel, meðal annars við færslu bókhalds. DV hafði samband við konuna og vildi hún ekki ræða málið við miðilinn.
DV sendi þá fyrirspurn á Grím Sigurðsson og spurði hvort rétt væri að eiginkona hans hefði starfað á skrifstofu félagsins og hvort hann teldi eðlilegt að hann hefði verið ráðinn skiptastjóri yfir búinu þrátt fyrir þessi tengsl.
Jóhannes Karl Sveinsson, lögmaður hjá Landslögum, svaraði fyrirspurninni fyrir hönd Gríms. Svarið er eftirfarandi:
„Hann Grímur samstarfsmaður minn framsendi mér þennan póst, en hann hefur ekki tök á að svara þér.
Héraðsdómur leitaði eftir því að Grímur skipti þessu þrotabúi og hann tók það að sér eftir að hafa upplýst um það sem þú nefnir að neðan, þ.e. að konan hans vann um tíma á skrifstofu Jóa Fel. Hvorugt þeirra átti nokkurra hagsmuna að gæta af skiptunum né tengjast þau félaginu eða eigendum þess á nokkurn hátt. Eiginkona Gríms kom heldur ekki að fjármálastjórn fyrirtækisins. Því var spurningunni sem þú leggur fram í niðurlagi bréfsins svarað áður en Grímur tók þetta að sér. Engar vanhæfisástæður sem eiga við um skiptastjóra áttu því við. Ekkert sem breytir þessu hefur heldur komið fram við skiptin og tengslin sem þú nefnir eru því engin.“
DV spurði þá hver störf eiginkonunnar hefðu verið og svaraði Jóhannes því þannig:
„Ég hef það ekki svo nákvæmt að ég geti lýst því í smáatriðum hvað hún gerði. Hún var ekki í stjórnunarstöðu hjá fyrirtækinu og var einfaldlega löngu hætt þegar gjaldþrotaskiptin komu til.“
DV hefur þráfaldlega kallað eftir úrskurði Héraðsdóms um gjaldþrotaskiptin en hann hefur ekki borist.
