Morgunblaðið skýrir frá þessu í dag. Haft er eftir Kristófer Oliverssyni, formanni fyrirtækja í hótel- og gistiþjónustu, að hægt sé að fara ýmsar leiðir í þessum efnum. „Fyrsta krafa okkar var að óska eftir því að fasteignagjöldin yrðu felld niður á tímum veirunnar. Til vara lögðum við fram þá tillögu, af því að við vitum að sveitarfélögin hafa ekki mikið aflögu, að fasteignagjöldunum yrði dreift með löngu skuldabréfi,“ er haft eftir honum.
Hugmyndin á bak við þetta er að Lánasjóður sveitarfélaga láni sveitarfélögunum upphæð sem samsvarar ógreiddum fasteignagjöldum. Sveitarfélögin myndu síðan gefa út skuldabréf fyrir ógreidd fasteignagjöld fyrir hvert fyrirtæki og yrðu skuldabréfin með lögveði í þeim fasteignum sem fasteignaskatturinn fylgir.
„Kjörin á skuldabréfunum yrðu að vera mjög hagstæð og spegla vexti Lánasjóðs sveitarfélaga. Þannig yrðu vextirnir í flestum tilvikum vel innan við 1%. Ef sú vaxtaprósenta gengi áfram til okkar félagsmanna yrði þetta viðráðanlegt. Um leið myndi tekjustreymið ekki raskast hjá sveitarfélögum,“ er haft eftir Kristófer sem sagði auðvelt að útfæra þessa leið og hann telji að vilji sé hjá ríkisvaldinu til að þetta geti orðið lausn. Lánasjóður sveitarfélaga sé nægilega öflugur til að taka þátt í þessu en hugsanlega þurfi hann að fá ríkisábyrgð til að hægt sé að liðka til fyrir þessari útfærslu.
