16 ný smit greindust í gær og af þeim voru aðeins 2 utan sóttkvíar. Sagði Þórólfur Guðnason að innanlandssmitum fækkaði nú jafnt og þétt, hægt og bítandi, og bæri að þakka góðum viðtökum almennings fyrir það.

Þá sagði Þórólfur að 13 væru nú látnir af völdum Covid-19 í þessari þriðju bylgju sem hófst 15. september. „Hlutfallið er nú orðið hærra en var í fyrstu bylgjunni, því miður,“ sagði hann. Á sjúkrahúsinu á Akureyri eru nú sex inniliggjandi, og enginn á gjörgæslu. Samtals hafa verið 160 einstaklingar innlagðir í þessari bylgju og er það hlutfall líka hærra en í fyrstu bylgju.

Þórólfur sagði að með áframhaldandi aðgæslu almennings hvað sóttvarnir varðar, væri ekkert því til fyrirstöðu að eiga góða aðventu, og góð jól.

5.101 hafa nú smitast af Covid-19 frá upphafi faraldursins og eru nú 621 í einangrun vegna smits. 68 einstaklingur eru á Landspítalanum sagði Páll Matthíasson. Rúmlega þúsund manns eru í sóttkví, eða 1.060.

Landspítali er áfram á neyðarstigi og enn mikið álag á heilbrigðiskerfinu. Þó sagði Víðir að álag væri að minnka í farsóttarhúsum og ástandið þar orðið stöðugt og viðráðanlegt.

Nýgengi smita er nú komið undir 150 og er nú 142,1. Hæst fór það í 290,7 þann 16. október.

Páll Matthíasson sagði jafnframt að dauðsföllin fimm vegna Covid-19 um helgina tengdust öll hópsmitsins á Landakoti, og að það sjötta væri yfirvofandi. Ástandið á Landspítalanum virðist fara batnandi en í máli Páls kom fram að fjöldi starfsmanna væri nú að losna úr sóttkví eða einangrun á næstu dögum. Þá væri búist við því að spítalinn færi af neyðarstigi fyrri hluta þessa viku, þó ekki í dag.