Frá því á föstudaginn fram á mánudag greindust rúmlega 3.000 íbúar í Stokkhólmi með kórónuveiruna sem veldur COVID-19. Þetta eru fleiri en greindust alla vikuna á undan. Á sama tíma fjölgaði sjúkrahúsinnlögnum vegna COVID-19 mikið. Þær voru 148 á föstudaginn en voru orðnar 203 í gær en þetta er 37% aukning.

Expressen skýrir frá þessu.

„Nú er þetta virkilega alvarlegt. Við höfum misst tökin. Við verðum að ná stjórn á þessu aftur,“

hefur blaðið eftir Björn Eriksson, forstjóra heilbrigðisstofnunar Stokkhólms.

Af þeim 203 sem lágu á sjúkrahúsi í gær voru 20 á gjörgæsludeild. Björn sagði að aukningu smita megi rekja til þess að íbúar í Stokkhólmi fylgi ekki nægilega vel leiðbeiningum yfirvalda um að halda góðri fjarlægð sín á milli og þvo sér um hendurnar.

„Við verðum að leggja aðeins meira á okkur en við gerum núna. Það gátum við í vor og við neyðumst til að gera það aftur,“

sagði Björn.

Í byrjun október lágu aðeins 30 COVID-19-sjúklingar á sjúkrahúsum í Stokkhólmi en allan mánuðinn fjölgaði smitum mikið.

Samkvæmt tölum frá í gær þá greindust 3.188 með kórónuveiruna í Svíþjóð sólarhringinn á undan. Í heildina hafa 124.355 greinst með veiruna í Svíþjóð frá upphafi heimsfaraldursins. Rúmlega 5.900 hafa látist.