Héraðsdómur Reykjavíkur dæmdi í lok síðustu viku mann sekan um kynferðislega áreitni með því að hafa þann aðfaranótt 11. nóvember 2018 á skemmtistaðnum Hressingarskálanum við Austurstræti þuklað á konu. Er athæfinu þannig lýst í dómnum að maðurinn hafi fært sig upp að konunni, þrýst mjaðmasvæði hans við rass konunnar og strokið mjaðmir hennar og maga með báðum höndum. Maðurinn er fæddur 11. nóvember 1976, og hafa því atburðirnir sem um ræðir gerst á 42 ára afmæli mannsins.

Brotaþoli gerði 800.000 króna miskabótakröfu í málinu. DV sagði frá því þegar ákæran var gefin út fyrr á árinu, en þar sem maðurinn fanst ekki til að birta honum ákæruna, var hún birt í Lögbirtingablaðinu, samkvæmt lögum þar um.

Kemur nú fram í dómnum að maðurinn hafi ekki sótt dómþing, og var dómurinn því kveðinn upp að honum fjarstöddum. Maðurinn var dæmdur til þess að greiða brotaþola hálfa milljón í miskabætur, 320 þúsund krónu málskostnað konunnar vegna málsins og um 150 þúsund krónur í sakarkostnað. Að öðru leyti var manninum ekki gerð refsing í málinu.

Í apríl í fyrra var maðurinn dæmdur í 15 mánaða fangelsi fyrir tilraun til nauðgunar.