Elísabetu Guðmundsdóttur lýtaskurðlækni hefur verið sagt upp störfum á Landspítalanum. Var henni sagt upp störfum í gær. Hún réð sig til Landspítalans þann 1. apríl síðastliðinn og er uppsagnarfrestur hennar einn mánuður. Í uppsagnarbréfi kemur fram að síðasti vinnudagur hennar sé 30. nóvember næstkomandi. Uppsögnin er skilgreind sem uppsögn á reynslutíma. Undir uppsagnarbréfið skrifa Pétur Hannesson yfirlæknir og Páll Matthíasson framkvæmdastjóri Landspítalans.
Elísabet stóð að undirskriftasöfnun undir þá kröfu að framhaldsskólar verði opnaðir aftur. Hefur hún talað gegn hörðum sóttvarnaaðgerðum vegna COVID-19. Einnig var hún í viðtali á Útvarpi Sögu fyrir stuttu þar sem hún viðraði skoðanir sem munu hafa fallið í grýttan jarðveg hjá mörgum í læknasamfélaginu. Sagði hún að heilmargt væri hægt að gera til að verjast því að veikjast, til dæmis styrkja ónæmiskerfið með því að taka inn D-vítamín, sem virkaði bæði gegn covid og öðrum veirum.
Ekki hefur fengið staðfest að brottrekstur hennar tengist þeim málum. Engin ástæða var gefin fyrir uppsögninni. Í samtali við DV segir Elísabet að hún telji engu að síður að brottreksturinn tengist því sem hvernig hún hefur tjáð sig um sóttvarnaaðgerðir. Hún segir jafnframt að hún óttist að lækningin sé verri en sjúkdómurinn þegar kemur að þeim aðgerðum.
Elísabet starfaði á sérstakri brjóstamiðstöð sem er undirdeild röntgendeildar Landspítalans. Hún var beðin um að taka starfið að sér eftir 20 ára feril í Svíþjóð. Hún segir að uppsögnin komi sér mjög illa þar sem hún sé fyrirvinna heimilisins.
„Ég hef ekki verið í neinni baráttu. Ég fór bara í viðtal þar sem ég talaði á jákvæðum nótum um hvernig fólk getur styrkt ónæmiskerfið sitt og áhyggjurnar sem ég hef af ungmennum og börnum í landinu, en 67% háskólanema eru komnir með klínísk einkenni kvíða og þunglyndis. Ég á sjálf dóttur sem er að byrja í menntaskóla. Svo hitti ég konur á hverjum degi í mínum störfum í brjóstamiðstöðinni sem eru með kvíða og hafa áhyggjur af börnunum sínum. Ég hef áhyggjur af því að lækningin sé orðin miklu verri en sjúkdómurinn. Margir kollegar eru sammála en enginn hefur þorað að tala um þetta,“ segir Elísabet.
„Mér finnst ég bera ábyrgð á heilsu allra og hjarta mitt slær með þeim sem við erum að reyna að bjarga sem hafa mörg hver verið í félagslegri einangrun í 8 mánuði og það er hræðilegt,“ segir Elísabet sem hefur miklar áhyggjur af andlegum áhrifum aukinnar einangrunar í samfélaginu vegna sóttvarnaaðgerða.
Elísabet segist hafa óskað eftir skýringum á uppsögninni en þær hafi ekki fengist. Hún var að koma á fundi með yfirmönnum sínum og fékk engin svör, að sögn. Yfirlæknirinn Pétur Hannesson afhenti henni uppsagnarbréfið í gær.
Elísabet segir að sárlega hafi vantað lækni í þá stöðu sem hún var ráðin í. Núna sé hún atvinnulaus og hafi þungar áhyggjur af framtíðinni.
DV hafði samband við Pétur Hannesson yfirlækni sem sagðist ekki geta gefið ástæður fyrir uppsögninni, hann geti ekki rætt starfsmannamál í fjölmiðlum.
