Kona sem rak fyrirtæki er gekk undir nafninu Snyrtilegur klæðnaður en var skráð undir heitinu Snyrtilegur ehf. hefur verið sakfelld fyrir skattsvik, bókhaldsbrot og peningaþvætti. Fyrirtækið hefur verið afskráð.

Konan var sökuð um að hafa staðið skil á efnislega rangri virðisaukaskattskýrslu félagsins fyrir árin 2014 og 2015, samtals upp á tæplega 15 milljónir króna.

Þá var hún sökuð um að hafa ekki réttilega staðið skil á bókhaldi félagsins.

Þá var hún sökuð um peningaþvætti með því að hafa aflað Snyrtilegum ehf. ávinnings af brotum, samtals tæplega 15 milljóna, og ráðstafað ávinningnum í þágu rekstrar einkahlutafélagsins, og eftir atvikum í eigin þágu.

Konan var fundin sek og dæmd í átta mánaða skilorðsbundið fangelsi. Þá var hún dæmd til að greiða 43 milljóna króna sekt til ríkissjóðs og þarf hún að sitja inni í tæpt ár ef hún greiðir ekki sektina.

Dómurinn var kveðinn upp í Héraðsdómi Reykjaness á föstudaginn.