Umboðsmaðurinn Gylfi Sigurðsson hjá Total Football segir að þrjár íslenskar knattspyrnukonur séu að vekja gríðarlega athygli hjá erlendum liðum þessa dagana. Áhuginn hafi kviknað eftir 1-1 jafntefli kvennalandsliðsins gegn Svíum í síðasta mánuði, liðin mætast aftur á morgun.

Sveindís Jane Jónsdóttir, Karólína Lea Vilhjálmsdóttir í Breiðablik og Hlín Eiríksdóttir í Val vekja mikla athygli þessa dagana. Allar hafa þær átt frábær sumar í efstu deild kvenna.

„Það var áhugi fyrir leikinn en eftir að honum lauk varð áhuginn verulega mikill. Það eru nokkur fjöldi liða í Svíþjóð sem vill fá Sveindísi og Karólínu,“ sagði umboðsmaðurinn Gylfi Sigurðsson við sænska fjölmiðla.

Viðræðurnar eru ekki komnar langt á veg. „Það er verið að spyrja um stöðu þeirra og lengd samninga, mesti áhuginn er frá klúbbum í Noregi og Svíþjóð. Hlín Eiríksdóttir sem kom við sögu í síðari hálfleik er einnig að vekja mikla athygli.“

Sveindís Jane er í eigu Keflavíkur en hún hefur skorað 14 mörk í 15 leikjum með Breiðablik í sumar, Karólína hefur skorað fjögur mörk og Hlín hefur skorað ellefu mörk fyrir Val.