Inga Lind Karlsdóttir framleiðandi og fluguveiðimaður elskar að veiða og skipta þá flugurnar sköpum. Hér deilir hún sínum uppáhalds flugum sem gætu jafnvel verið góð hugmynd í jólapakka fyrir veiðimenn. Það er ekki seinn vænna að byrja að huga að slíku – það er nú einu sinni búið að setja upp jólin í Ikea!

1. Jock Scott
Nýjasta uppáhaldið mitt er fluga sem ég hef aldrei átt og aldrei veitt á. Hún er hins vegar næsta fluga sem ég ætla að verða mér úti um. Jock Scott er ekki bara ein frægasta og vinsælasta fluga síns tíma, hönnuð á 19. öld, heldur líka ein sú alfallegasta sem hægt er að finna. Hver veit nema hún virki enn í íslenskum ám sumarið 2021? Það er bara ein leið til að komast að því.

2.Frances
Bæði svört og rauð og í öllum stærðum, frá litlum krúttum með gylltum króki og upp í túpur sem nauðsynlegt er að setja undir þegar vatnið býður ekki upp á neitt minna. Frances er óumdeilanlega ekki fallegasta flugan í boxi nokkurs veiðimanns, en hún er fáránlega aflasæl, ekki síst í mínum bókum, og hefur alltaf verið. Mynd: Samsett DV

3. Bleikur Nobbler
Ég er tiltölulega nýfarin að veiða sjóbirting og er rétt að komast inn í flugutískuna á þeim vettvangi. Enn sem komið er toppar ekkert bleika nobblerinn sem ég fékk 95 cm sjóbirting á í fyrra.

4.Hitch
Hitch eru í miklu uppáhaldi hjá mér. Það er svo gaman að fylgjast með þeim skauta yfir hylinn á yfirborðinu og ég held að fátt toppi tökuna þegar árásargjarn lax ræðst á hana.

5. Skáskorinn Skuggi og Sunray Shadow
Þessar eru líka alltaf til í boxinu mínu. Truflaðar flugur og ég er með þá kenningu að ef laxinn tekur þær ekki þá er hann annað hvort ekki í hylnum eða hann mun ekki taka neitt þann daginn. Svo verð ég að lauma Frigga inn í lokin. Ég ætla ekki að ljúga þó sá gaur, í ýmsum litum, sé ekki áberandi í boxinu hefur hann gefið okkur hjónum fjölmarga fiska, bæði laxa og sjóbirtinga, og þar með framkallað óumræðilega gleði.