Efling hefur birt ársfjórðungsskýrslu kjaramálasviðs og eru þar nafngreind þrjú fyrirtæki sem eru með fleiri en 10 opnar launakröfur hjá Kjaramálasviði.
Flestar eru launakröfurnar á hendur Bryggjunni-brugghús eða alls 23 kröfur og nemur heildarfjárhæð þeirra rúmlega 27,4 milljónum króna.
Næst kemur Messinn þar sem 13 launakröfur eru nú í vinnslu og nema rúmlega 5,3 milljónum. Athuga ber þó að um er að ræða fyrri rekstraraðila Messans, en nýr eigandi tók við staðnum í sumar og segir hann kröfurnar honum óviðkomandi.
City Park Hotel Ármúla og Capital-Inn Suðurhlíð eru svo talin saman. Þangað hafa verið gerðar 11 launakröfur sem nema um 9,9 milljónum.
Í skýrslunni er jafnframt greint frá því að Kjaramálasvið hafi fengið vitneskju um nokkra rekstraraðila sem hafa farið í gjaldþrot með vangoldin laun en hafið starfsemi að nýju á nýrri kennitölu.
Algeng er að þessir rekstraraðilar ráði aftur til sín starfsmenn úr gjaldþrota fyrirtækjum sínum án þess að hafa gert upp við þá eldri launakröfur. Oft falla launakröfur á Ábyrgðarsjóð launa sem þýðir að langan tíma getur tekið fyrir starfsmenn að innheimta vangoldin laun fyrir störf sín í fyrra fyrirtæki.
Nefndir eru tveir vinnustaðir í dæmaskyni. Primo í Þingholtsstræti og Topp þrif, en síðarnefnda fyrirtækið er á sinni þriðju kennitölu.
Sólveig Anna Jónsdóttir, formaður Eflingar, ásamt Ingólfi B. Jónssyni, aðstoðarsviðsstjóra kjaramálasviðs, skrifuðu grein í Morgunblaðið í dag þar sem þau segja atvinnurekendur hafa lært inn á kefið á Íslandi.
Óprúttnir atvinnurekendur hafa lært inn á þetta kerfi. Þeir nýta sér æ grimmar þann fjárhagslega hvata til launaþjófnaðar sem refsileysið býr til. Heildarupphæð launakrafna Eflingar hefur vaxið um 40% á ári síðustu fimm ár. Launaþjófnaður á íslenskum vinnumarkaði er í veldisvexti. Nú er svo komið að kröfurnar nema um milljón á dag.“
Þessar tölur taki ekki mið af því að margir launþegar veigri sér við að leita sér aðstoðar stéttarfélags af ótta við að missa vinnuna.
