Rithöfundurinn Lady Colin Campbell segir að Meghan Markel, hertogaynja, hafi meðvitað búið til mikið drama í kringum sig og eiginmanninn Harry og hafi tekið umdeildar ákvarðanir á grunni úthugsaðrar almannatengslaáætlunar sem átti að tryggja að hún yrði þekktasta manneskja heims.

Page Six skýrir frá þessu. Fram kemur að Campbell hafi sagt þetta í spjallþætti Graham Norton á BBC nýlega. Campbell skrifaði bók um Díönu prinsessu fyrir nokkrum árum.

Í þættinum sagði hún að almannatengslaáætlunin hafi verið gerð af Meghan og að Harry hafi samþykkt hana. Hún sagði að Meghan hafi meðvitað gert hluti, sem ekki „má“ þegar maður tilheyrir konungsfjölskyldunni, til að ná markmiði sínu. Hún sagði að viðskilnaður hjónanna við konungshöllina hafi verið hluti af áætlun Meghan.

„Þetta er meðvituð áætlun. Að vera nógu umdeild því annars verður maður ekki nægilega frægur.“

Campbell skrifaði bókina „Meghan and Harry: The Real Story“ sem kom út í sumar. Í þættinum játaði hún að áætlun Meghan hefði áhrif á hana því hún væri að skrifa bók um Meghan og þar með að taka þátt í áætluninni.

„Ég held að við séum að upplifa svolítið sem mun fara í sögubækurnar og mér er alveg sama um hvort hún verður frægasta manneskja heims eða ekki. Það eina sem skiptir mig máli er hvort hér sé saga sem þarf að segja,“ sagði hún og bætti við að hjónin hafi reynt að hafa áhrif á skrif hennar í gegnum sameiginlega vini.