Sigmundur Davíð Gunnlaugsson, formaður Miðflokksins, kynnir til leiks nýjan hóp í samfélaginu – Ybbana – í grein sem birtist í Morgunblaðinu um helgina. Greinin vakti nokkra athygli á samfélagsmiðlinum Twitter sem varð til þess að Sigmundur hefur nú endurbirt greinina á vefsíðu sinni nú með skjáskotum af Twitter sem hann telur styðja við kenningu sína um íslenska ybba.

Rétttrúnaðarfólkið

Sigmundur bendir á að ákveðnir hópar fólks hafi sett sinn svip á tíðarandann í gegnum söguna. Til dæmis hippar, pönkarar, uppar, og þannig fram eftir götum. Nú sé kominn fram ákveðinn hópur sem einkenni okkar tíma en þeim hafi til þessa vantað íslenskt nafn.

„Stundum er talað um „rétttrúnaðarfólkið“ eða „háværa minnihlutann“. Í kaldhæðni er jafnvel rætt um „góða fólkið“ með vísan til sjálfsálits meðlima hópsins. Það er hins vegar nokkuð óþjált en einnig óheppilegt í ljósi þess að meðlimir hópsins eiga margir erfitt með að skilja fyrirbæri á borð við kaldhæðni, háð og húmor,“ skrifar Sigmundur. 

Þennan hóp kallar Sigmundur ybbana.

„Nafnið er viðeigandi vegna þess að meðlimir hópsins telja sig yfirleitt yfir aðra hafna og álíta sig jafnan yfirburðafólk með yfirburði yfir „fávísan og fordómafullan almúgann“

Dygðamont

Sigmundur fer í nokkru löngu máli yfir það sem einkennir þennan hóp einstaklinga. Meðal annars segir hann ybba telja sig yfir aðra hafna og telji sig hafa það hlutverk að vera yfirboðarar hinna fávísu. Nafnið sé dregið frá uppáhalds iðju hópsins

„að ybba sig, ybba gogg og útskýra fyrir öllum öðrum hvers vegna þeir hafi rangt fyrir sér. Þetta er yfirleitt gert af talsverðu yfirlæti.“

Ybbar séu gjarnir á að liggja yfir Twitter og leita eftir tækifærum til að sanna yfirburði sína í opinberri  umræðu.

„Þá má ekki missa af nokkru tækifæri til að sýna dygðamont.“

Ybbar sanni sig fyrir öðrum ybbum með því að taka aðra verri einstaklinga fyrir á samfélagsmiðlum og níða af þeim skóinn. Margir taki þátt í slíkri orðræðu af ótta við að verða annars að næsta skotmark ybbanna.

Ef þú ert ekki betri en aðrir ert þú verri en aðrir. Ef þú fylgir ekki nýjasta rétttrúnaðinum ert þú villutrúar. Ófáir hátt skrifaðir ybbar hafa fallið í ónáð eftir eitt skynsamlegt tíst.

Dæmi um þekktan frasa sem ybbar noti óspart segir Sigmundur að sé: „ef þú ert ekki hluti af lausninni ert þú hluti af vandamálinu.“

Menningarnám, kyn og trú

Dæmi um málefni sem ybbum séu hugleikið sé umræðan um kyn

„Hversu mörg eru kynin? Ef þú spyrð ybba koma mörg svör til greina (eftir því hversu framsæknir þeir eru), öll svör nema 2.“

En einnig umræður á borð við trúarbrögð – þar sem öll trúarbrögð eru varin kjafti og klóm nema kristni og gyðingdómur, feðraveldið, jafnrétti, mannréttindi og menningarnám.

Ekki er langt síðan „fjölmenning“ var ógagnrýnanlegt hugtak. Þrátt fyrir galla í framkvæmd fylgdi þó réttmæt ábending um að samfélög læri hvert af öðru og tileinki sér það sem reynst hefur vel annars staðar. Nú er slíkt glæpur í huga hins upplýsta ybba og kallast menningarnám. Aðeins Kínverjar mega selja kínverskan mat og Mexíkóar mexíkóskan. Leyfileg hárgreiðsla er meira að segja bundin við kynþætti.

Íslenskir ybbar

Með grein sinni deilir Sigmundur skjáskotum af Twitter sem hann telur styðja við mál sitt og hlýtur því þar af leiðandi að telja viðkomandi tístara ubba. Hér má sjá dæmi um þau tíst sem Sigmundur valdi sem myndskreytingu með grein sinni. Tístin eiga það sammerkt að vera annað hvort dæmi um ybba að mati Sigmundar eða gagnrýni á ofangreind greinaskrif Sigmundar.

Það er nokkuð hraustlega gert að skrifa heila grein sem á að skilgreina hópinn ‘ybbana’ en finna ybbunum það helst til foráttu að þeir séu alltaf að skilgreina fólk.

— Gísli Marteinn (@gislimarteinn) October 10, 2020

Einn eina ferðina kemur skýrt í ljós hvað þessum manni er mikið skítsama um staðreyndir, sannleik, vilja, hugsjónir eða fólk. Hann skrifar bara það sem þjónar hans viðbjóðslegu hugmyndafræði. pic.twitter.com/o9fE8cLiae

— Sóley Tómasdóttir (@soleytomasar) October 10, 2020

Greinilegt að sú ályktun hefur verið dregin að “góða fólkið” hafi misheppnast sem skammaryrði, og að nú þurfi því að tefla fram öðru í þess stað. #JeSuisYbbi

— Vilhjálmur Þorsteinsson (@vthorsteinsson) October 10, 2020

Það er enginn stoppari. Greinar miðaldra manna með forréttindablindu flæða fram af sama krafti og jökulsá á vorin. pic.twitter.com/KfArXpcPkE

— Sigurborg Ósk Haraldsdóttir (@SigurborgOsk) September 9, 2020

Hefur eitthvað farið framhjá mér, eða hefur enginn þingmaður XD fordæmt ummæli Ásmundar Friðrikssonar, og enginn fjölmiðill spurt þá eða forystu um viðbrögð þeirra?
Þingmaður hrópar „Ísland fyrir Íslendinga!“ á tímum flóttamannakrísu og því er mætt með þögn?

— Gísli Marteinn (@gislimarteinn) September 26, 2020

Eru Ybbar hans útgáfa af ANTIFA?

— Hrafn Jónsson (@hrafnjonsson) October 10, 2020