Neyðarlínunni barst tilkynning um eldinn skömmu fyrir miðnætti á föstudagskvöldið. Starfsmaður Neyðarlínunnar vísaði tilkynnanda áfram til lögreglunnar en hún svaraði ekki, síminn hringdi út. Morgunblaðið skýrði frá þessu í dag. Fram kemur að lögreglunni hafi svo borist tilkynning um bílinn á laugardaginn klukkan 13.30. Þá var bíllinn illa útileikinn og mikið brunninn. Oddur Árnason, yfirlögregluþjónn á Suðurlandi, staðfesti þetta í samtali við Morgunblaðið og sagði að skoðað verði af hverju tilkynningin á föstudagskvöldið hafi ekki skilað sér til lögreglunnar.
Morgunblaðið segist hafa heimildir fyrir að það hafi verið sumarhúsaeigendur í Grafningi sem hringdu í Neyðarlínuna á föstudagskvöldið þegar þeir töldu sig sjá eld hinum megin Sogsins. Þeir töldu sig einnig sjá bremsuljós bifreiðar. Það getur ekki hafa verið húsbíllinn sem brann því framendi hans sneri að vatninu.
Nú hefur lögreglan tjáð sig um málið í tilkynningu á heimasíðu sinni. „Við rannsókn á bruna í húsbíl í landi Torfastaða í Grafningi hefur komið fram að um kl. 23:30 föstudaginn 9. október var tilkynnt til Neyðarlínu um eld sem gæti mögulega verið í bíl eða húsi og tiltekið í tilkynningunni að eldurinn væri í landi Torfastaða. Tilkynnanda var gefið samband frá Neyðarlínu til fjarskiptamiðstöðvar lögreglu en þar virðist, að hans sögn, hafa hringt út,“ segir í tilkynningu lögreglu.
Þá segir að í ljósi tímasetningarinnar á brunanum sé sérstaklega óskað eftir því að heyra frá þeim sem voru á ferðinni í Grafningi og þar í grennd um kl 22:00 og fram að miðnætti síðastliðins föstudags. Lögreglan er því að leita að vitnum. „Tilkynnandi sá sem hringdi í Neyðarlínu talaði sérstaklega um mögulega umferð ökutækis við brunavettvanginn þegar eldurinn var hvað mestur og óskar lögreglan eftir því að fá upplýsingar frá þeim sem þar hefur mögulega verið á ferðinni.“
