Svört staða er uppi í samgöngumálum Eyjamanna. Nú blasir við að ekkert áætlunarflug verði til Vestmannaeyja í vetur og enn hafa starfsmenn Herjólfs ekki verið endurráðnir. Nýhafnar eru samningaviðræður milli Vestmannaeyjabæjar og Vegagerðarinnar og segir í fundargerð bæjarstjórnar að allur samningurinn sé undir. Ólíklegt þykir að nokkuð muni skýrast í málefnum Herjólfs fyrr en þær samningaviðræður klárast.
Þann 1. september sagði DV frá því að öllum starfsmönnum Herjólfs hafi verið sagt upp og að Ernir hygðist hætta áætlunarflugi sem flugfélagið hafði staðið að síðastliðin ár. Njáll Ragnarsson, oddviti Eyjalistans og formaður bæjarráðs Vestmannaeyja, sagði þá við DV að ákvörðun Ernis væri mikil vonbrigði og aðdragandinn hafi verið stuttur. „Flugsamgöngur eru engin lúxus. Öryggi Eyjamanna sé undir, auk þess sem að atvinnulífið reiði sig á eins öruggar flugsamgöngur til Eyja og náttúran leyfir,“ sagði Njáll.
Síðan þá virðist lítið hafa þokast, að minnsta kosti hvað vetrarsamgöngur varðar. Í vikunni var reyndar tilkynnt að Air Iceland Connect hygðist hefja áætlunarflug á markaðsforsendum til Vestmannaeyja frá og með næsta vori. Annar örsigur virðist hafa náðst í vikunni þegar Isavia dró til baka uppsagnir allra þriggja starfsmanna flugvallarins. Íris Róbertsdóttir fagnaði þessum sigrum innilega í samtali við DV: „Þetta eru mjög jákvæðar fréttir bæði af Isavia og áætlunarfluginu. Það er góð tilfinning þegar árangur næst með samtali og samvinnu við aðila. Alltaf er hægt enn betur en þetta eru mjög góð skref,“ sagði Íris. Með því að halda í starfsmennina þrjá verður hægt að tryggja viðhald vallarins í vetur og auka notkunarmöguleika hans. Völlurinn verður þá í hið minnsta aðgengilegur sjúkraflugi, þó ekkert yrði áætlunarflugið.
Air Iceland Connect, áður Flugfélag Íslands, ætti nú að þekkja flugvöllinn í Vestmannaeyjum enda flaug flugfélagið þangað í áraraðir. Fluginu hætti félagið þegar ríkisstyrkir til innanlandsflugs voru aflagðir í ríkisstjórnartíð Jóhönnu Sigurðardóttur.
Enn eru allir starfsmenn Herjólfs að vinna sinn uppsagnarfrest. Hann klárast 1. desember og eru samgöngur á sjó ótryggðar með öllu eftir það. Bærinn vinnur nú að endurskoðun þjónustusamnings við Vegagerðina um rekstur ferjunnar. Rekstur hennar var áður á höndum Vegagerðarinnar en eftir óánægju Eyjamanna með rekstur hennar og þjónustu var reksturinn færður til bæjarins á grundvelli þjónustusamnings. Án þjónustusamnings er enginn Herjólfur, og án Herjólfs engar samgöngur á sjó, bersýnilega.
Í fundargerð bæjarráðs Vestmannaeyja um Herjólfsmálið segir:
Bæjarráð leggur áherslu á að niðurstöður viðræðna milli samninganefndar Vestmannaeyja og Vegagerðarinnar vegna rekstur Herjólfs skýrist fljótt svo hægt sé að eyða óvissu félagsins og starfsmanna um framhaldið.
