Ásthildur Sturludóttir, bæjarstjóri Akureyrar, biðst velvirðingar á því að hafa stuðað fólk með ummælum sínum í kvöldfréttum RÚV í gærkvöld. Ásthildur bað Reykvíkinga um að koma ekki til Akureyrar næstu vikur á meðan kórónuveirufaraldurinn er á flugi. Smit eru langflest á höfuðborgarsvæðinu og kynntar voru hertar aðgerðir í gær sem ná eingöngu til höfuðborgarsvæðisins.
Ásthildur sagði að Akureyringar hefðu gætt mjög vel að sóttvörnum og þess vegna væru mjög fá smit á Akureyri. Margir skildu Ásthildi þannig að Reykvíkingar væru kærulausari gagnvart veirunni en norðanfólk og fór þetta fyrir brjóstið á mörgum. Ásthildur skýrði síðan mál sitt í færslu sem hún birti í gærkvöld:
„Í viðtali á RÚV í kvöld um ástandið í Covid-19 málum hældi ég sveitungum mínum fyrir að fylgja vel sóttvarnarreglum. Það hefur stuðað suma og það þykir mér leitt, því hólið mátti skilja þannig að ég teldi að aðrir fylgdu reglum síður. Það er fjarri mér að halda það þó trú mín á Akureyringum sé óbilandi. Í fréttinni tók ég líka undir orð sóttvarnalæknis og forsætisráðherra um að fólk ætti ekki að vera á faraldsfæti á milli landshluta nema brýna nauðsyn beri til og það gildir um okkur öll. Ástandið í landinu er að verða grafalvarlegt vegna faraldursins og við þurfum öll að standa saman og fara varlega hvert og eitt. Samstaða er besta sóttvörnin!“
https://www.facebook.com/asthildur.sturludottir/posts/10157304911697077
