Strákarnir voru eldri en sonur konunnar og voru um það bil 10 saman í hóp að drekka bjór þegar sonur hennar lenti í þeim. „Þið hrópuðuð allskonar orðum að honum og reynduð að fá hann til að koma til ykkar til að slást við ykkur,“ segir móðirin þegar hún greinir frá málinu í Facebook-hóp hverfisins.
Sonur hennar náði rétt svo að finna sér rafhlaupahjól sem hann gat tekið á leigu til að komast undan strákunum. „Hann þurfti síðan að keyra út í blautt gras þar sem hann var næstum því búinn að slasa sig eftir að nokkrir af ykkur reyndu að stökkva fyrir hann og króa hann af í myrkrinu,“ segir móðirin.
Atvik gærkvöldsins minnti soninn á alvarlega hnífaárás sem hann varð fyrir í Englandi í fyrra. „Strákurinn minn lenti í árás frá unglingsdrengjum þar sem einn var með hníf og réðst á hann á miðjum degi þar sem hann var að labba heim eftir bíóferð með vinum sínum. Þeir króuðu hann af og reyndu að ræna hann og annar stakk hann grunnt í kviðinn. Sonur minn náði að losna og hljóp eins hratt og hann gat heim,“ segir móðirin í samtali við DV um málið.
„Þetta atvik í gær vakti upp sama ótta og tók langan tíma að fá hann til að róast niður vegna adrenalíns,“ segir móðirin en sonur hennar hefur átt erfitt með að labba einn úti eftir atvikið á Englandi. Móðirin segir atvikið í gær hafa bætt gráu ofan á svart í þeim efnum.
Í færslunni sem hún birti á Facebook sendi hún skilaboð til strákanna sem sonur hennar rakst á. „Ef þið sem að gerðuð þetta eruð að lesa þetta þá bið ég ykkur um að hugsa ykkur tvisvar um áður en þið takið upp á því að hegða ykkur á svona heimskulegan hátt því eitt svona atvik getur haft alvarlegar afleiðingar til langs tíma,“ segir hún.
„Það er sorglegt að hugsa til þess að unglingurinn minn geti ekki stokkið út í Krambúð til að versla bleyjur á litla bróður sinn á laugardagskvöldi án þess að eiga hættu á að ráðist sé á hann.“
