Hér er hún komin, brakandi fersk stjörnuspá fyrir vikuna. Hvað segja stjörnurnar um næstu viku ?
Hrútur
21. mars–19. apríl
Þú þráir breytingu og það helst í dag! Þú átt það til að vera hvatvís. Þegar svona orka kemur til þín getur allt gerst. Það verður gaman að vita hvaða flippi þú tekur upp á. Hvort sem það er að selja sófann, klippa af þér hárið eða kaupa eitthvað sem þig vantar ekki. Við bíðum spennt.
Naut
20. apríl–20. maí
Þú færð loks svar við spurningu sem hefur valdið þér svefnleysi. Þetta verður sannkallað „aha“- augnablik sem kemur með fulla tunglinu 1. október. Stundum þurfa ákveðin atriði að raðast upp til þess að svör verði augljós. Þetta skýrist síðar í vikunni.
Tvíburar
21. maí–21. júní
Oft á tíðum vakna tilfinningar með fulla tunglinu. Líkt og hafið, flóð og fjara, við erum 70% vatn og tunglið hefur viðeigandi áhrif á skapsveiflur okkar. Gefðu þér stund til þess að greina hvað liggur á bak við þessar tilfinningar og hvað þú getur gert í þeim.
Krabbi
22. júní–22. júlí
Orkan er þér hliðholl þessa vikuna. Margt sem hefur setið á hakanum kemst loksins í verk. Ef þú ert að selja bíl eða húsnæði þá nýtist þessi orka þar. Sannkölluð framkvæmdagleði drífur þig áfram inn í október.
Ljón
23. júlí–22. ágúst
Þú nýtur þín verulega í haustdýrðinni: Tekur myndir af haustlitunum, kveikir á kertum, ullarsokkar á kvöldin með Noruh Jones í bakgrunni, bakstur og kósíheit. Þú hefur rétta viðhorfið, tekur breytingum og áskorunum fagnandi.
Meyja
23. ágúst–22 .sept
Ástríðufull orka streymir til þín. Fólk gjörsamlega dregst að þér eins og segull. Sjarminn í hámarki og sjálfsástin blómstrar. Það er svo svakalega sjarmerandi. Ekki kippa þér upp við óvænt boð á stefnumót. Þú ert bara svona ómóstæðileg/ur
Vog
23. sept–22. okt
Þú nennir svo gjörsamlega ekki að vera fullorðin/n stundum! Vogin er ekki þekkt fyrir að taka lífinu of alvarlega en alvarlegt virðist það þó vera þessa dagana. Þessa vikuna hleypur þú púkanum út og ræktar þitt innra barn. Ráð vikunnar: Leiktu þér!
Sporðdreki
23. okt–21. nóv
Kannski ekki í fyrsta sinn sem þú þarft að gæta orða þinna en þú færð áminningu um það í vikunni. Þú nennir ekki að sykurhúða hlutina en stundum gætir þú farið milliveginn svo allir verði glaðir. Þannig kemur þú upplýsingum áfram án þess að koma neinum í uppnám.
Bogmaður
22. nóv–21. des
Úps, setti einhver kæruleysispilluna í kaffið þitt? Ef svo er þá er það einmitt það sem læknirinn hefði ráðlagt þér. Mögulega gleymir þú kaffimálinu ofan á bílþakinu þessa vikuna en þú finnur mikinn létti yfir því að gefa smá „so what“ í hlutina. Við þurfum öll smá skvettu af kæruleysi í kaffið.
Steingeit
22. des–19. janúar
Þú mátt svo sannarlega vera spennt/ur fyrir komandi tímum. Þótt þú sért ekki komin/n á áfangastaðinn þá ertu á réttri braut. Vittu til, það mun birta til. Þú finnur mun með hverjum deginum og sérð skýrar hvert þú stefnir.
Vatnsberi
20. janúar–18. febrúar
Það er nú ekki líkt þér að vera bitur þannig að þú mátt bara gjöra svo vel og hætta því núna. Það þjónar engum tilgangi að halda í svona tilfinningar. Hristu þetta af þér og haltu áfram að vera hamingjusami hippinn sem fer þér svo miklu betur.
Fiskar
19. febrúar–20. mars
Þú ert í bjargvættarstuði; stendur á svölunum með ímyndaða skikkju sem blæs í vindinum og bíður eftir símtali frá einhverjum nánum í neyð! Ertu mögulega að hunsa einhver önnur vandamál heima við?
