Logi Einarsson, formaður Samfylkingarinnar var harðorður í garð hægri manna og ríkistjórnarinnar í ræðu sinni á Alþingi í kvöld. Hann ræddi einnig loftlagsmál, mál flóttamanna og hælisleitenda.

Hann sagði að ríkisstjórnir um allan heim væri farið að líta til stefnu jafnaðarmanna, hvort sem það væri vinstri eða hægri sinnað.

„Á þessum skringilegu tímum verður gangverk samfélagsins nánast áþreifanlegt. Hvert tannhjól hefur áhrif á það næsta og lítil bilun – jafnvel í því smæsta – slævir allt gangverkið.

Sjaldan hefur mikilvægi ríkisvaldsins og sterkrar almannaþjónustu birst með jafn skýrum hætti  – Aldrei augljósara að heilbrigt samfélag þarf öfluga samneyslu, jöfnuð, fjölbreytni og þátttöku allra.

Hugmyndir hægrimanna um að reglulítill markaður greiði sjálfur úr öllum vandamálum og skili réttmætum gæðum til almennings dæma sig nú endanlega sjálfar.

Nú eru lausnir jafnaðarstefnunnar mikilvægastar í baráttunni við heimsfaraldurinn, og ríkisstjórnir um allan heim – jafnt til vinstri og hægri – líta til þeirra kinnroðalaust.

Í heimsfaraldri – og sögulegu atvinnuleysi – getur almenningur á Íslandi líka reitt sig á jafnaðarstefnuna. Einnig í baráttunni gegn hamfarahlýnun.“

Logi sagði að þjóðin stæði frammi fyrir flóknum verkefnum, en að fyrsta verk þyrfti að vera að „hrista af sér gamaldags kreddur“ um ríkisfjármál og verðmæti. Hann sagði hreinlega að það væri of dýrkeypt að fylgja hugmyndafræði Sjálfstæðisflokksins í loftlagsmálum.

„Við stöndum andspænis gríðarlega flóknum verkefnum sem verða ekki öll leyst á stuttum tíma. En fyrsta skrefið er að skipta um kúrs, snúa skútunni frá hægri og hrista af okkur gamaldags kreddur um það hvernig ríkisfjármál virka og hvernig verðmæti verða til.

Á tímum loftslagshamfara og heimsfaraldurs höfum við ekki efni á því að leyfa hugmyndafræði Sjálfstæðisflokksins eða fjármálastefnu hægrimanna að ráða för, – Það er einfaldlega allt of mikið í húfi.

Og þess vegna er mikilvægara en nokkru sinni, að við sem höfum önnur gildi –trúum á aðra leið. Séum ábyrg, séum staðföst og snúum bökum saman.“

Að lokum sagðist hann vilja búa til græna félagshyggjustjórn eftir næstu kosningar.

„Það er hlutverk Samfylkingarinnar að leiða saman þau öfl sem eru tilbúin að fylkja sér um vinnu, velferð og græna framtíð – og mynda græna félagshyggjustjórn eftir næstu kosningar.“