Nikolaj Jacobsen, þjálfari karlaliðs Dana í handknattleik, varð fyrir því nýlega að tyrkneskir tölvuþrjótar náðu stjórn á tölvupósti hans, Facebook og Instagram. Þeir kröfðu hann um 5.000 dollara fyrir að veita honum aftur aðgang.

B.T. skýrir frá þessu. Tölvuþrjótarnir græddu hins vegar ekkert á Jacobsen sem vildi alls ekki greiða þetta „lausnargjald“.

„Ég sagði bara: „Þetta er í lagi, þið megið bara hafa þetta“. Síðan byrjaði ég bara aftur með nýja aðganga á Facebook og Instagram,“

sagði Jacobsen sem sagði að hann hefði gengið í gildru þrjótanna þegar hann fékk tölvupóst frá Instagram Support Team sem hann svaraði.

Hann sagðist hafa verið með 37.000 fylgjendur á Instagram og það sé auðvitað leiðinlegt að missa þá en það skipti hann svo sem ekki miklu því hann noti Instagram ekki í fjárhagslegum ávinningi, þetta sé hans einkaaðgangur. Hann sagðist sjá einna mest eftir Facebook því þar hafi verið mikið af myndum frá því þegar börnin hans voru lítil.