RUV greindi frá því í kvöldfréttatíma sínum að rúmlega fimmtugum manni hefur verið birt ákæra fyrir morð. Segir þar að ákæran hafi verið gefin út í júní en sé nú fyrst birt opinberlega. Héraðssaksóknari sækir málið.

Þar segir enn fremur að fimm hafi verið handteknir í desember eftir að maður féll fram af svölum á þriðju hæð fjölbýlishúss í Úlfarsársdal í Reykjavík. Lést maðurinn við fallið. Fjórum var fljótlega sleppt en sá fimmti úrskurðaður í gæsluvarðhald. Sá er fimmtugur maður frá Litháen. Sá látni var landi hans.

Umsvifamikil rannsókn fór strax af stað og mun lögregla hafa fengið til liðs við sig verkfræðinga til aðstoðar við rannsókn málsins. Munu þeir hafa notað brúður til að líkja eftir falli mannsins af svölunum. Brúðan var þá látin líkjast manninum í hæð og þyngd. Niðurstaða þeirrar rannsóknar var að manninum hafi verið kastað eða ýtt af talsverðu afli fram af svölunum.