Það var TV4 sem sýndi myndbandið og af stað fór mikil umræða um umsvif glæpagengja í landinu. Þessi umræða er framhald af umræðu sem hefur verið í gangi síðustu daga eftir að þungir dómar voru kveðnir upp í Danmörku yfir meðlimum sænsks glæpagengis sem myrtu tvo menn, úr öðru sænsku glæpagengi, í Herlev á síðasta ári. DV skýrði frá því máli nýlega.
Á upptökunni, sem TV4 sýndi og sjá má hér fyrir ofan, sjást ungir menn ógna lögreglumönnum og í raun taka yfir stjórn á vettvangi þar sem lögreglumennirnir eru að hafa afskipti af ungum manni. Lögreglumennirnir stöðvuðu akstur hans þar sem hann ók skellinöðru. Þegar þeir ætluðu að handtaka hann þyrptust aðrir menn að og fóru að skipta sér af málinu.
Það skiptir engu þótt lögreglumennirnir gefi mönnunum ítrekuð fyrirmæli um að hafa sig á brott, þeim hlýða þeir ekki heldur færa sig upp á skaftið. Eins og fyrr segir hótar einn því að taka kylfu annars lögreglumannsins og troða upp í hann.
Atvikið átti sér stað 2019 í Gautaborg. Erik Nord, lögreglustjóri, segir að mennirnir tengist allir glæpagengi í borginni.
Aftonbladet segir að lögreglan hafi ekki náð stjórn á ástandinu fyrr en fleiri lögreglumenn voru komnir á vettvang. En þetta er ekki einstakt tilvik því það er mjög algengt að ungir menn séu ögrandi í garð lögreglunnar eða hafi jafnvel í hótunum við hana.
Einn angi af þeirri umræðu, sem nú á sér stað, er hvort lögreglumenn eigi að njóta nafnleyndar. Katharina von Sydow, formaður samtaka lögreglumanna, segir að sögn Aftonbladet að hótanir í garð lögreglumanna séu orðnar persónulegri en áður og beinist í auknum mæli að mökum þeirra eða börnum. Hún sagðist því vonast til að sænskir lögreglumenn fái að notast við númerakerfi þar sem nöfn þeirra koma ekki fram.
Eins og DV skýrði frá í gær þá blandaði Mats Löfving, vararíkislögreglustjóri, sér nýlega í umræðuna um málefni innflytjenda og skipulögð glæpagengi í Svíþjóð. Hann sagði að meðlimir margra þessara glæpagengja hafi eingöngu komið til Svíþjóðar til að stunda afbrot.
