Maður um fertugt hefur verið ákærður fyrir að nota ekki öryggisbelti er hann ók bíl í Vestmannaeyjum sumarið 2019. Fráfarandi lögreglustjóri í Vestmannaeyjum, Páley Borgþórsdóttir, gaf út ákæru á manninn, sem býr í Noregi, þann 10. júní í sumar. Settur lögreglustjóri í Vestmannaeyjum, Arndís Bára Ingimarsdóttir, hefur tekið við málinu og er ákærandi gegn manninum, en málið verður þingfest þann 8. október næstkomandi, í Vestmannaeyjum.

Fyrirkall og ákæra hafa verið birt í Lögbirtingablaðinu. Í fyrirkallinu segir:

„Ákærði er kvaddur til að koma fyrir dóm, hlýða á ákæru, halda uppi vörnum og sæta dómi. Sæki ákærði ekki þing má hann búast við því að fjarvist hans verði metin til jafns við það að hann viðurkenni að hafa framið brot það sem hann er ákærður fyrir og dómur verði lagður á málið að honum fjarstöddum.“

Ekki hefur tekist að birta manninum ákæruna. Viðurlög við því að nota ekki öryggisbelti eru 20 þúsund króna sekt.