„Það er grátbroslegt að þegar ofbeldi kemur inn í líf manns að þá er eins og það margfaldist og maður sér það út um allt, endalaust. Við tölum samt lítið um afleiðingarnar. Það vilja fáir heyra um þær – þær eru ekki jákvæðar,“ segir Guðmunda Smári Veigarsdóttir meðlimur í stjórn Samtakanna´78.

Guðmunda, sem notast við kynhlutlausa fornafnið héð segir ofbeldi gegn hinsegin fólki vandlega falið í samfélaginu. Nauðsynlegt sé að grípa til aðgerða svo að ríkjandi hatursglæpir og haturðsorðræða fái ekki að grassera áfram.

Í pistli sem birtist á vef Vísis segir Guðmunda vandamálið vandlega vera falið vegna þess að sú umræða er ekki á þeim jákvæðu nótum sem flestir vilja að einkenni umræðuna um málefni hinsegin fólks.

Guðmunda Smári Veigarsdóttir. Ljósmynd/Úr einkasafni.

„Jákvæð umræða er það sem skilar mestum árangri. Verum jákvæð og glöð, ekki rugga gagnkynhneigða regluveldinu og alls ekki dissa feðraveldið!“

Þá bendir Guðmunda á að hér er ekki um að ræða afmarkað tilvik: fjölmargir hinsegin einstaklingar líði sálarkvalir vegna þessa:

„Heyrðuð þið um trans stelpuna sem var kynferðislega áreitt og niðurlægð fyrir að vera trans? Heyrðuð þið um allt trans fólkið sem var hent út af klósettinu á djamminu með valdi? Heyrðuð þið af hommanum í dragi sem var öskrað á og hótað þegar hann labbaði niður Laugaveginn? Heyrðuð þið þegar ungum hinsegin krökkum er boðinn peningur fyrir „kynlíf” því þau eru hinsegin? En um trans gaurinn sem var barinn því hann var trans? Það er fullt af atvikum sem aldrei er sagt frá því þau eru ekki jákvæð.“

Guðmunda telur erfitt að að halda umræðunni á jákvæðum nótum á meðan hryllingurinn fái að vaða uppi.

„Get ég verið jákvætt þegar það eina sem ég heyri er meira ofbeldi? Þegar ég veit að „kerfið” er hryllingur? Þegar mitt hinsegin samfélag er enn bara meðvirkt? Þegar aldrei hefur fleira trans fólk verið drepið í heiminum en árið í ár? Þegar fólk opinberlega heldur því fram að það sé ekki þörf á hatursglæpadeild lögreglunnar? Þegar fólk neitar að nota rétt nafn um mig? Þegar rannsóknir sýna að hinsegin ungmenni eru líklegri til sjálfskaða en aðrir en þrátt fyrir það fæst ekki fjármagn fyrir félagsmiðstöð hinsegin ungmenna? Þegar ég bíð með kvíðahnút eftir frétt af fyrstu íslensku trans manneskjunni sem verður myrt, því hún var trans?“

segir Guðmunda jafnframt og bendir á að ofbeldi gegn hinsegin fólki eigi aðeins eftir að aukast.

„Við getum undirbúið okkur, unnið saman til að minnka skaðann. Hættum að vera meðvirk, tökum þetta alvarlega og bætum líf nýrrar kynslóðar hinsegin fólks.“