Heimildarmaður DV greindi frá lögregluaðgerð á Grettisgötu í dag. Tveir menn reyndu þar að flýja undan lögreglu. Sérsveitin kom á vettvang en sjónvarvottur greinir frá fjórum lögreglubílum, tveimur lögregluhjólum og mörgum lögreglumönnum auk tveggja manna sem lögðu á flótta.

DV náði sambandi við Guðmund Pétur Guðmundsson lögreglufulltrúa og sagði hann að aðgerðin tengdist tilkynningu um stolinn bíl. „Það hafði verið tilkynnt um að bíl hefði verið stolið úr vesturborginni fyrr í dag og það sást til þessa bíls niðri í bæ. Það var í raun bara verið að stoppa og vinna úr þessu. Það voru handteknir einhverjir aðilar.“

Aðspurður hvort þetta hefði ekki verið nokkuð mikill viðbúnaður þá svaraði Guðmundur því að þetta snerist um hverjir væru tiltækir hverju sinni. Oft sé Sérsveitin nálægt líka.

„Oft þarf einfaldlega að bregðast við með næstu tækjum til að ná þeim sem eru á ferðinni.“ sagði hann.

Guðmundur neitaði því ekki að menn hefðu lagt á flótta en sagði að það hefði enga þýðingu þegar lögreglan eigi í hlut, menn náist alltaf. Hann staðfesti að ökumaður bílsins hefði verið handtekinn en gat ekki svarað til um hvað margir aðrir. Samkvæmt sjónarvotti voru hinir handteknu tveir.