24 voru fluttir á sjúkrahús í Osló í Noregi í nótt vegna gruns um kolsýringeitrun. Sjö eru sagðir vera í lífshættu. Lögreglu- og sjúkraflutningamenn þurftu að veita nokkrum lífsbjargandi aðstoð á vettvangi. Fólkið er á aldrinum 20 til 30 ára.

Samkvæmt fréttum Norska ríkisútvarpsins og TV2 voru alls 24 fluttir á sjúkrahús, þar á meðal tveir lögreglumenn sem urðu einnig fyrir eitrun.

Fólkið var í ólöglegu samkvæmi á St. Hanshaugen í nótt. Lögreglan vissi ekki af samkvæminu fyrr en lögreglumenn á eftirlitsferð sáu nokkra aðila sem voru illa á sig komnir nærri samkvæmisstaðnum. Allt tiltækt björgunarlið var þá kallað út.

Samkvæmið var haldið í neðanjarðarbyrgi að sögn lögreglunnar. Sjö voru bornir meðvitundarlausir út úr byrginu og fengu sumir þeirra lífsbjargandi aðstoð á vettvangi áður en þeim var ekið á Lovisenberg og Ullevål sjúkrahúsin.

Norska ríkisútvarpið hefur eftir André Kråkenes, talsmanni lögreglunnar, að ástand þessara sjö sé mjög alvarleg og margir séu í lífshættu.

Háskólasjúkrahúsið í Osló sendi frá sér tilkynningu í nótt þar sem allir, sem voru í samkvæminu, eru beðnir um að leita þegar til læknis ef þeir sýna einhver einkenni kolsýringeitrunar. Einkennin eru höfuðverkur, svimi, ógleði og það að nánast líði yfir fólk.

Lögreglan veit ekki hversu margir voru í samkvæminu en telur að það hafi verið á bilinu 30 til 80 manns.

Eins og er telur lögreglan að eitunin hafi komið frá kælikerfi sem var notað í tengslum við tónlistarflutning í samkvæminu.