Gunnar Smári Egilsson, stofnandi Sósíalistaflokksins og fjölmiðlamaður fer ekki fögrum orðum um Icelandair í færslu sem birtist á Facebook-síðu hans í gærkvöldi. Hann segist ekki skilja ást fólks á fyrirtækinu, honum finnist aðbúnaðurinn vondur og hroki yfirstjórnarinnar óásættanlegur.

„Ég á erfitt með að tengja við ást fólks á Icelandair. Ég man ekki betur en að flugvélarnar séu gamlar, oft á eftir áætlun, sætin þröng, afþreyingarefnið gamalt og fábreytt, maturinn vondur, fargjaldið dýrt og hrokinn í yfirstjórninni yfirgengilegur.“

Gunnar vill meina að það eina sem er gott við Icelandair sé starfsfólkið. Þó verði það hvað mest fyrir barðinu á sjálfu fyrirtækinu, en hann segir að Icelandair hafi ráðist á starfsfólkið og brotið á því.

„Það eina góða við Icelandair voru flugfreyjurnar og -þjónarnir, hjálpsamt fólk, hlýlegt, brosmilt og yfirlætislaust. En á sama tíma og stjórnendur Icelandair bugta sig fyrir lánardrottnum félagsins og birgjum þá hafa þeir ráðist akkúrat á það starfsfólk sem eru það eina góða við þetta fyrirtæki, brotið lög á því, rekið það í miðri kjaradeilu, hótað því og svínbeygt til að geta haft af því fé til að færa lánardrottnunum.“

Að lokum biður Gunnar um að afsaka sig, en segir þó að sá sem að haldi með Icelandair hljóti líka að halda með Svarthöfða í Stjörnustríðs-myndunum.

„Þið afsakið, en ég ber akkúrat enga virðingu fyrir þessum stjórnendum og plönum þeirra, ef það var einhvern tímann tilefni til að virða Icelandair þá er sá tími liðinn. Fólk sem segist vilja félaginu vel hlýtur að halda með Darth Vader í Star Wars.“

https://www.facebook.com/gunnar.smari.egilsson/posts/3570820102936462