Stundin greindi frá því í dag að Áslaug Arna Sigurbjörnsdóttir dómsmálaráðherra hafi verið sótt af þyrlu Landhelgisgæslunnar úr hestaferð á Suðurlandi og skutlað henni svo til baka. Áslaug sótti hálfan samráðsfund heilbrigðisráðherra um Covid faraldurinn sem var streymt á netinu og tók ekki til máls.
Segir í frétt Stundarinnar að afar sjaldgæft sé að flogið sé með ráðherra og það sé yfirleitt þegar um er að ræða heimsóknir erlendra ráðamanna, á varnaræfingum eða öðrum opinberum erindagjörðum. Það hafi ekki verið raunin nú. Ásgeir Erlendsson, upplýsingafulltrúi Landhelgisgæslunnar, sagði við Stundina að áhöfnin hafi verið til staðar á fimmtudag vegna flugs með starfsmenn Veðurstofunnar sem var á dagskrá þann dag og að frumkvæðið að fluginu með ráðherrann hafi komið frá Landhelgisgæslunni.
Ásgeir sagði við blaðamann DV að ekki séu til staðar tölfræði um kostnað vegna flugs þyrlunnar og að erfitt sé að reikna slíkt út. Ásgeir sagði að þyrlusveitir þurfi að uppfylla ákveðna flugtíma á ári og þar sem þyrluvakt var til staðar og vaktin tilbúin í annað verkefni sama dag hafi enginn aukakostnaður hlotist af fluginu. Það sama svar gaf Ásgeir þegar Guðlaugi Þór Þórðarsyni utanríkisráðherra var skutlað af þyrlu Landhelgisgæslunnar til fundar við Mike Pence í Keflavík meðan á heimsókn hans stóð. Sú ferð tók 25 mínútur og var í tengslum við heimsókn erlends þjóðhöfðingja.
Enn fremur sagði Ásgeir við DV nú að Veðurstofuverkefnið hafi verið að kanna hugsanlegt hlaup í Svartá, en ekki hafi verið hægt að fara í það verkefni á miðvikudeginum vegna lágrar skýjahæðar.
Ásgeir segir við DV að það hafi verið í samtali Georgs Lárussonar forstjóra Landhelgisgæslunnar og Áslaugar Örnu sem það kom upp að Áslaug væri stödd á Suðurlandinu og þyrfti að komast í bæinn. Mun það hafa borist í tal að Áslaug væri stödd í námunda við Vík, eða í Reynisfjöru hinum megin við Reynisfjall frá Vík í Mýrdal, og þyrfti að komast þaðan á fund í Reykjavík. Georg Lárusson hafi þá boðist til þess að láta sækja hana og koma henni á fundinn, og skutla henni svo til baka að fundi loknum.
Stundin segir að Áslaug Arna hafi ekki verið meðal ræðumanna á fundinum, og samkvæmt heimildum Stundarinnar hafi hún hlustað á ræður og yfirgefið fundinn áður en starf vinnuhópa hafi hafist. Fundinum var streymt á netinu og fjöldi takmarkaður vegna sóttvarnarreglna.
Segir stundin jafnframt frá því að vélin hafi farið frá Reykjavík klukkan 7:00 og verið komin til baka kl 8:40, flugið til Reynisfjöru og til baka hafi því tekið klukkutíma og fjörutíu mínútur, eða 75 mínútum lengur en flugið með Guðlaug Þór til Keflavíkur í fyrra.
Lagt var af stað frá Reykjavík aftur klukkan 11:06 og hafi þyrlan sótt sérfræðinga Veðurstofunnar í kjölfarið til þess að athuga Svartá.
Áslaug Arna var sem fyrr sagði í hestaferð með föður sínum og birtu þau myndirnar hér að neðan úr ferðinni.
View this post on Instagram
Það var dýrmætt að ná smá sól og hestbaki með pabba þó það hafi orðið stutt í báða enda. 🌤😷
