Hér er hún komin, brakandi fersk stjörnuspá fyrir vikuna. Hvað segja stjörnurnar um næstu viku ?
Hrútur
21.03. – 19.04.
Þú ert eflaust byrjuð/aður að fasta eða komin/n í 3 vikna hreinsunarkúr. Við styðjum þig heilshugar fagri Hrútur því þú ert tilbúin/n í rútínu og nýja áskoranir og ekki síst þær sem snúa að sjálfum þér. Mundu þó að þetta er langhlaup og skyndilausnir eru til þess fallnar að valda vonbrigðum.
Naut
20.04. – 20.05.
Nautið okkar er í hreiðurstuði líkt og þegar kona er rétt að fara missa legvatnið. Ólétt eður ei þá finnur þú mikla löngun til að nostra, mála, kaupa nýjan Ikeaskáp eða jafnvel skrolla í gegnum fasteignavefinn.
Tvíburar
21.05. – 21.06.
Ha?! Hvað sagðir þú? … ég heyrði það ekki alveg! Það er út af því við heyrum ekki hugsanir. Ótrúlegt hvað það er stundum auðvelt að fá sitt fram ef maður nær að koma orðum að því. Finndu kjarkinn og segðu það upphátt.
Krabbi
22.06. – 22.07.
Heppilegur fundur fer vel og þú rennur í nýjar framkvæmdir! Nýtt atvinnutækifæri og það í nýrri grein sem gefur þér tækifæri til þess að læra og stækka. Nú má ekki seinna vera, farðu að opna Excel og plana og pæla.
Ljón
23.07-22.07.
Óskaðu þér! Verði þinn vilji og allt það. Heimurinn er þér sérlega hliðhollur um þessar mundir. Lögmál aðdráttaraflsins á hér við, rissaðu upp, skrifaðu og teiknaðu þessar óskir, sjáðu það fyrir þér og áður en þú veist verður þetta að raunveruleika.
Meyja
23.08. – 22.09.
Ef þú átt óklárað verk eftir þá er þetta vikan til þess að drífa það í gegn. En stundum er það einmitt eitthvað sem dregur úr eða heldur aftur af okkur ef manni finnst eitthvað óuppgert. Þetta íþyngir þér meira en þig grunar. Koma svo – klára málið!
Vog
23.09. – 22.10.
Þú ættir auðvitað helst að búa í einhverri kommúnu. Fólkið þitt er þér allt og þú finnur það sérstaklega þessa dagana. Hlustaðu á innsæið og nýttu tímann þinn í samverustundir með vinum og fjölskyldu.
Sporðdreki
23.10. – 21.11.
Þitt helsta eðli fær að njóta sín þessa vikuna og það er að vera leiðtogi. Ný verkefni sem krefjast stjórnunar koma til þín og þú tekst á við þau eins og allt annað sem kemur til þín – af fagmennsku og alúð. Mundu bara að jafnvægið milli vinnu og heimilisins er lykillinn að góðu janfvægi.
Bogmaður
22.11. – 21.12.
Frelsið er yndislegt og ég geri það sem ég vil … eftir smá mótlæti þá finnur þú farsælan farveg á ný og sérð allt í nýju ljósi. Þú hefur unnið þér inn góð karmastig. Lífið fer að verðlauna þig á næstu dögum. Allt fer að ganga upp og jafnvægið tekur yfir.
Steingeit
22.12. – 19.01.
Kæra Steingeit, ef þú hefur verið eitthvað stefnulaus þá ekki örvænta. Ný tækifæri koma til þín á næstunni og það fleiri en eitt, alveg þannig að þú færð góðan valkvíða í staðinn. Njóttu síðusta daga sumarsins því þetta verður erilsamur vetur hjá þér.
Vatnsberi
20.01. – 18.02.
Þú finnur þessa vikuna að það er mikilvægt fyrir þig að finna sjálfstæði í því sambandi sem þú ert í. Hvort sem það er með maka eða nánum vini þá muntu finna meira frelsi í að læra líka að vera einn með sjálfri/um þér og ekki stóla á neinn annan.
Fiskur
19.02. – 20.03.
Sjálfsást og dekur, takk fyrir! Lognið eftir storminn er mætt en þú þarft að passa að huga vel að þér. Þér líður eins og allt sé í lagi en mögulega áttu eftir að vinna smá úr því sem hefur komið upp á síðustu misseri. Ekki láta gamla erfiðleika hlaða utan á sig.
