„Ég var veikur og kom því ekki í verk að tilkynna mig, ég er kominn nokkuð langt fram yfir,“ segir Þráinn Stefánsson, miðaldra maður sem búsettur er í Taílandi. Þrátt fyrir að Þráinn eigi lögheimili í Taílandi þarf hann að endurnýja dvalarleyfi sitt á þriggja mánaða fresti. Fangelsisvarðhald bíður þeirra sem láta slíkt farast fyrir.

DV sló á þráðinn til Þráins eftir að hjálparbeiðni frá honum var birt á samfélagsmiðlum. Í bréfi Þráins segir:

„Þessi póstur minn er kall á hjálp. Ég er búinn að vera fastur í Tælandi í 9 ár. Ég reyndi að koma heim í fyrra en fékk ekki stimpil útúr landi. Ég er ekki búinn að borða í meira en viku og er alveg auralaus. Ég er líka hræddur um að löggan setji mig í fangelsi ef þeir athuga með mig. Er alltaf kvíðinn og stressaður hér. Ég þrái að komast heim til Íslands og er það ætlun mín að flytja heim og vera heima það sem eftir er. Er einhver sem getur hjálpað mér? Er í mjög slæmri stöðu hér og get ekki fengið neina aðstoð.“

Í samtali við DV staðfestir Þráinn að hann hafi ekki borðað í viku. Utanríkisráðuneytið hefur hafnað hjálparbeiðni hans á grundvelli þess að hann eigi lögheimili í Taílandi. Þráinn er þó íslenskur ríkisborgari og greiðir skatta á Íslandi.

Hefur Þráinn nú leitað ásjár hjá Velferðaráðuneytinu en fær svör síðar í dag eða á morgun um hvort ráðuneytið geti hjálpað honum.

Þráinn freistar þess að komast burtu frá Taílandi áður en hann verður handtekinn. Til þess skortir hann fé.

Dóttir Þráins, sem býr hér heima á Íslandi, reynir að liðsinna honum varðandi samskipti við Utanríkisráðuneytið. Því miður hafa engin svör borist þaðan ennþá við fyrirspurninni en línur gætu skýrst síðar í dag eða í fyrramálið, að sögn hennar og Þráins.

Þeir sem vilja styrkja Þráin í þessum vanda geta lagt inn á eftirfarandi styrktareikning: 

544 05 416475 og kt. 2911612789.