Þegar Anneka Bading skoðaði myndir í myndavélinni sinni að fríinu loknu sá hún að hún hafði tekið myndir á sama tíma og maður drukknaði fyrir aftan hana án þess að hún hefði hugmynd um hvað var að gerast. Myndin hefur vakið mikla athygli að undanförnu.

Anneka var í fríi í Grampians þjóðgarðinum, vestan við Melbourne í Ástralíu, fyrir tveimur árum. Þegar hún var að baða sig í MacKenzie Falls datt 28 ára maður frá Taívan út í. 40 ferðamenn, sem voru á staðnum, reyndu allt sem þeir gátu til að bjarga manninum en án árangurs. Sterkur straumurinn dró hann niður og hann drukknaði. Lík hans fannst daginn eftir.

Anneka, sem er frá Ástralíu, var að synda fyrir neðan fossinn þegar þetta gerðist og tók um leið upp myndir með GoPro myndavél. Skilti eru í þjóðgarðinum sem vara fólk við að fara út í vatnið við hina öflugu fossa en þeim hafði hún ekki tekið eftir. Það var ekki fyrr en hún skoðaði upptökuna að hún áttaði sig á hinum hörmulega atburði sem átti sér stað fyrir aftan hana.

Myndinni hefur verið mikið dreift á samfélagsmiðlum að undanförnu til að vekja athygli á að víða í Ástralíu er farsímasamband lélegt. Til dæmis náði Anneka ekki sambandi þegar hún ætlaði að hringja eftir aðstoð þennan örlagaríka dag og það gerðu aðrir ferðamenn á svæðinu heldur ekki. Hún varð að hlaupa eins kílómetra leið að bíl sínum og aka tíu kílómetra til að komast í símasamband.