Samkvæmt ákærunni greiddu pörin henni háar fjárhæðir fyrir. Eitt parið greiddi henni 61.000 danskar krónur, annað 172.000 krónur og það þriðja 226.000 krónur. Þetta átti að dekka kostnað hennar við frjóvgun og meðgöngu en hann var mun lægri. Auk þess segir í ákærunni að konuna hafi skort „vilja“ til að vera staðgöngumóðir.
Verjandi hennar sagði að konunni hafi borist rúmlega 1.000 hótanir, þar af margar morðhótanir, eftir að málið komst í hámæli.
„Á Facebook skrifaði einhver að rífa ætti legið úr skjólstæðingi mínum. Þetta eru ofbeldisfullar hótanir og það hafa einnig verið morðhótanir.“
Sagði hann og bætti við að þetta hefði verið kært til lögreglunnar.
Fjallað var um konuna í heimildamynd TV2, „Den falske rugemor“ (Falska staðgöngumóðirin) en í þættinum kom fram að hún hafi tekið að sér staðgöngumæðrun fyrir mörg barnlaus pör á sama tíma og hafi farið í tæknifrjóvgun á Kýpur. Hún sagði pörunum að frjóvgunin hefði ekki heppnast.
Með tveggja daga millibili var frjóvguðum eggjum komið fyrir í legi hennar. Tvö pör greiddu fyrir þetta en vissu ekki af hvort öðru. Konan varð á endanum barnshafandi og eignaðist tvíbura sem hún leyndi fyrir pörunum sem hún hafði þóst ætla að hjálpa. DNA-rannsókn leiddi í ljós að annar mannanna er faðir barnanna.
Tvíburarnir hafa nú verið teknir úr umsjá „staðgöngumóðurinnar“ og dvelja hjá fósturfjölskyldu.
Auk svikanna er konan ákærð fyrir skjalafals, ólöglega meðferð fundinna muna og tryggingasvik.
