Tæplega 600 börn hafa þurft að liggja á sjúkrahúsum í Bandaríkjunum vegna bólgueinkenna sem tengjast COVID-19. Tölurnar, yfir fjölda barnanna, ná yfir fjögurra mánaða tímabil þar sem heimsfaraldur kórónuveirunnar hefur verið í miklum vexti í Bandaríkjunum. Bandaríska smitsjúkdómastofnunin CDC skýrir frá þessu.

Bólgueinkennin sem um ræðir eru fjölkerfa og geta valdið kawasaki heilkenninu en það er bólgusjúkdómur sem leggst aðallega á börn. Hann veldur hita, útbrotum, bólgnum kirtlum og í verstu tilfellum kransæðabólgum. Á Vísindavef Háskóla Íslands er hægt að lesa nánar um heilkennið.

Einkennin hjá bandarísku börnunum komu fram um tveimur til fjórum vikum eftir að einkenni COVID-19 gerðu vart við sig hjá þeim. CDC segir að miðað við aukningu COVID-19 tilfella í Bandaríkjunum fjölgi börnum og unglingum sem fá sjúkdóminn og því megi jafnvel búast við fleiri tilfellum af þessum bólgueinkennum. Þau komi þó ekki endilega strax fram því venjulega líði nokkur tími þar til þau komi í ljós.

Frá 2. mars til 18. júlí tilkynntu læknar um 570 tilfelli og létust 10 börn af völdum þessara bólgueinkenna á tímabilinu. Öll börnin greindust með COVID-19.