Brotist var inn í vinnuskúra hjá bæjarvinnunni í Hafnarfirði í nótt og stolið rafhlöðum úr sláttuorfum og persónulegum munum starfsfólks, til dæmis fatnaði og heyrnartólum. Þetta staðfestir Ingibjörg Sigurðardóttir, garðyrkjustjóri Hafnarfjarðar. Segir hún ennfremur að hluti af þýfinu hafi fundist í plastpoka skammt frá vettvangi, meðal annars hafi verið hleðslutæki og rafhlöður í sláttuorf í pokanum.

Starfsfólkið sem varð fyrir þjófnaðinum er sumarvinnustarfsfólk á aldrinum 17 til 20 ára. Segir Ingibjörg tjónið óþægilegt fyrir viðkomandi starfsmenn en málið sé í heild fremur léttvægt og hafði ekki áhrif á starfsemina í dag.