Stjörnuhjónin komu fjölmörgum á óvart þegar það fréttist að þau hefðu eignast lítinn dreng í vikunni en þeim hafði tekist að halda þunguninni leyndri fyrir öllum öðrum en nánustu vinum og fjölskyldu. Þau hafa haldið til á heimili sínu í Montana síðan í mars og Covid faraldurinn hefur gert þeim auðveldara fyrir en ella að halda sig út af fyrir sig. Justin og Jessica hafa verið saman frá árinu 2007. Þau giftu sig árið 2012 og eiga fyrir fimm ára gamlan son, Silas Randall. Fregnir herma að móðir Jessicu, Kimberly Conroe Biel, hafi dvalist hjá þeim eftir barnsburðinn en það var svo vinur hennar sem staðfesti fregnirnar og kyn barnsins.
Í fyrra stóð samband Jessicu og Justins á brauðfótum í kjölfar myndbirtinga af Justin ásamt mótleikkonu sinni Alishu Wainwright við tökur á kvikmyndinni Palmer. Á myndunum sem teknar voru á bar í New Orleans sjást þau haldast í hendur undir borði og Alisha sést hvíla hönd sína á hné hans. Justin fann sig knúinn til að biðjast opinberlega afsökunar á hegðun sinni og birti bréf á Instagram síðu sinni þar sem hann kvaðst hafa drukkið of mikið og sýnt af sér slæma dómgreind en tók skýrt fram að ekkert óviðurkvæmilegt hefði átt sér stað á milli þeirra og klykkti út með orðunum; „Ég hefði átt að vita betur. Þetta er ekki það fordæmi sem ég vil setja syni mínum.“
