Almannavarnanefnd Grindavíkur heldur fund í dag samkvæmt RÚV. Til umræðu verður skjálftahrina sem verið hefur á Reykjanesskaga undanfarið. Samkvæmt Salóme Jórunnar Bernharðsdóttur, sérfræðingi á Veðurstofu Íslands, má búast við að jarðhræringar haldi áfram.
Öflug skjálftahrina hefur staðið yfir á Reykjanesskaga frá því um miðnætti. Jarðskjálfti að stærðinni 5 varð norðan við Grindavík. Tveir eftirskjálftar að stærðinni 4 urðu snemma í morgun. Um tuttugu eftirskjálftar mældust í nótt og í morgun. Engin merki eru um gosóróa. Skjálftarnir hafa meðal annars fundist í Vestmannaeyjum, á Hvolsvelli og í Borgarfirði.
Samkvæmt sérfræðingum á Veðurstofu Íslands eru skjálftarnir hluti af hrinu sem hófst í febrúar. Jarðskjálftahrinan teygir sig nú austar sem skýrir hvers vegna skjálftarnir hafa fundist á höfuðborgarsvæðinu.
„Það má ætla að þetta séu flekahreyfingar, tektónískir atburðir,“ segir Salóme Jórunn Bernharðsdóttir, sérfræðingur á Veðurstofu Íslands við RÚV. Hún segir upptök allra sterkustu skjálftanna raðast á brotalínu og þannig séu skjálftarnir í samræmi við „tektónískar“ brotalínur á Reykjanesi. Skjálftarnir skýrist sennilega af auknu álagi á skorpuna af völdum kvikuinnskota sem komið hafa undir Reykjaneshrygginn. Hún býst við því að hræringarnar haldi áfram og segir ekki liggja fyrir hvort landið hafi risið.
