Undirmenn á Vestmannaeyjaferjunni Herjólfi, sem eru félagsmenn í Sjómannafélagi Íslands, hefja sína þriðju vinnustöðvun í mánuðinum á morgun. Vinnustöðvunin mun standa yfir í þrjá daga, 21.-23. júlí.
Þrátt fyrir verkfallsaðgerðir mun Herjólfur III sigla fjórar ferðir á milli lands og Eyja. Þetta kemur fram í tilkynningu á Facebook síðu Herjólfs. Þar segir að framkvæmdastjórn Herjólfs ohf. telji að tryggja þurfi með óyggjandi hætti öruggar samgöngur milli Vestmannaeyja og lands enda sé þetta eina samgöngukerfið sem tryggir aðgengi íbúa og lögaðila að nauðsynlegri þjónustu. „Greiðar og öruggar samgöngur eru forsenda lífsgæða sem allir landsmenn gera kröfur til,“ segir í tilkynningunni.
Þeir undirmenn sem munu vera í áhöfn á meðan á verkfalli stendur koma úr röðum annarra stéttarfélaga en Sjómannafélagi Íslands. Ekki verður boðið upp á þjónustu í kaffiteríu ferjunnar.
Verkfallið snýst meðal annars um vinnu- og vaktafyrirkomulag.
Hér má sjá tilkynningu Herjólfs.
https://www.facebook.com/herjolfurvestmannaeyjar/posts/782275699184810
