Fréttir um Andreu Rán Snæfeld Hauksdóttir, knatttspyrnukonu í Breiðabliki, vöktu mikla athygli í gær. Andrea greindist með Covid-19 og varð það til þess að mikill fjöldi þurfti að fara í sóttkví ásamt því sem leikjum í Pepsi Max-deild kvenna var frestað.
Fótbolti.net birti nafn Andreu í frétt sinni um málið og var nafn hennar birt í öðrum fjölmiðlum í kjölfarið. Andrea kenndi þá sjálfri sér um og leið ömurlega. RÚV fjallaði um málið í gær og kom þar fram að fjölskylda Andreu væri búin að kæra Fótbolta.net til Persónuverndar og Blaðamannafélagsins fyrir mynd- og nafnbirtinguna. Málið er nú í ferli þar.
„Hvernig komumst við þangað?“
Jakob Bjarnar Grétarsson, fréttamaður Vísis, veltir þessu fyrir sér í færslu sem hann birti í Facebook-hópnum Fjölmiðlanördar. „Hvernig má það vera að ung kona vilji kenna sjálfri sér um að hafa fengið þennan kórónaveirusjúkdóm?“ spyr Jakob. „Hvernig komumst við þangað? Og af hverju telur hún og þeir sem standa henni næst það ígildi sakbendingar, dóms og refsingar að nafn hennar sé nefnt í því samhengi?“
Hann segir það kannski vera vegna þess að tveir af stærstu fjölmiðlum landsins, mbl.is og RÚV, hafi tekið viðtal við Andreu og birt þessi sjónarmið athugasemdarlaust. „Eins og þau séu hin eðlilegustu?“
„Hvernig er það þá glæpur?“
Jakob segist hafa ríka samúð með Andreu. „En bagalegt er að þessi afstaða og viðurkenning á henni hlýtur að viðhalda skaðlegum furðuhugmyndum um fjölmiðla, hugmyndum sem samkvæmt þessu eru því miður viðteknar hér á Íslandi. Að það sé ekki síður hlutverk fjölmiðla að halda upplýsingum frá almenningi en að miðla þeim. Og þeir eigi að vega það og meta hverju sinni. Og viðmiðið virðist vera hvað einhverjum sem enginn veit hver er kann hugsanlega að finnast í fávisku sinni. Því ekkert annað stenst skoðun.“
Hann segir fjölmiðla hafa fyrir löngu misst hliðvörsluhlutverk sitt, það sé ekki lengur hlutverk fjölmiðla að ákveða hvað heyrir til opinberrar birtingar. „Nú veit ég ekkert um það en ekki er ólíklegt að þetta nafn hafi verið birt á netinu. Það er þá opinber birting. Hvernig er það þá glæpur Fótbolti.net að greina frá því fyrir sína lesendur?“
„Ég vona sannarlega að siðanefnd BÍ standist prófið.“
Að lokum vitnar Jakob í athugasemd frá Tóta nokkrum. „Dettur einhverjum í hug að „uppruna smitsins mátti rekja til fótboltakonu í Breiðablik, sem var nýkomin heim frá Bandaríkjunum…“ sé ígildi nafnleyndar?“ spurði Tóti um málið. Þá veltir hann fyrir sér hvernig það hefði þá átt að segja þessa frétt. „Svarið blasir auðvitað við,“ segir Jakob. „En hér viljum við halda fjölmiðlum í þeirri stöðu að vera einhvers konar kirkja falsks tepruskapar. Ég vona sannarlega að siðanefnd BÍ standist prófið.“
