Sumir hafa nefnt þennan dag Bobby Bonilla daginn enda hlýtur Bonilla að gleðjast á þessum degi þegar bankabókin tútnar aðeins meira út. Það er kannski engin furða að samningur hans teljist einn sá besti sem gerður hefur verið.
„Ég hef alltaf verið meðvitaður um að fjárhagur leikmanna verður að vera stöðugur þegar ferill þeirra er á enda. Hvað geta hafnaboltaleikmenn eiginlega í hinum raunverulega heimi? Þetta er eins og að vera kóngur. Þetta er það eina sem þér er kennt.“
Hefur USA Today eftir Dennis Gilbert, sem var umboðsmaður Bonilla og gerði samninginn góða fyrir hans hönd.
„Í tilfelli Bobby vildi ég tryggja fjárhagslegt öryggi hans til æviloka.“
Sagði Gilbert einnig.
Óhætt er að segja að það hafi honum tekist og vel það.
Þegar New York Mets vildi losna við Bonilla 1999 var hann orðinn 36 ára og hafði ekki staðið sig vel á vellinum það árið. Liðið vildi einfaldlega semja um starfslok hans. Bonilla hafði áður leikið með félaginu frá 1992 til 1995 og var þá launahæsti leikmaður deildarinnar. Hann yfirgaf þá liðið áður en samningur hans rann út. Í tengslum við þá brottför var samið um að þau laun sem hann átti inni fengi hann greidd síðar en þetta er aðferð sem mörg bandarísk íþróttafélög notfæra sér til að rjúfa ekki það hámark sem er sett á launagreiðslur þeirra.
1999 var sama staða uppi og aftur var þessi leið farin. Samið var um að Bonilla fengi launin sín síðar eða frá 2011 og næstu 25 árin. Samið var um að átta prósent vextir myndu leggjast ofan á þau. Það verða að teljast ansi góðir vextir í dag en stýrivextir í Bandaríkjunum eru nú 0,25%.
Bonilla mun fá þessa árlegu greiðslu þar hann verður 72 ára. Upphæðin er dágóð en í núverandi leikmannahópi Mets eru aðeins sex leikmenn sem fá hærri laun en hann.
